مهما كان سنك والوقت اللي ابتديت فيه تتابع الكورة وتهتم بالماتشات، أكيد هتبقى عارف عصام الحضري، وأكيد عدى عليك واحد من أشهر الهتافات الكروية في مصر وهو “ارقص يا حضري” وهتشوفه وهو طالع بكل حماس فوق الشبكة يرقص ويحتفل مع الجمهور، بعد كل بطولة بيعملها “السد العالي” بيحمي فيها العرين المصري من أهداف كان ممكن تمنعنا من الوصول للبطولات اللي اتعودنا نكسبها.
وفي عيد ميلاد “السد العالي” هنحتفل بواحد من أهم وأشهر حراس المرمى المصريين في تاريح كرة القدم، حابين نفتكر لقطات له مع المنتخب المصري محفورة في ذاكرة الجمهور، ونفتكر ليه سميناه السد العالي.
أمم أفريقيا 2006 ولقب “السد العالي”
البطولة اللي أقيمت على أرض مصر، وفوزنا فيها ووقتها الشوراع المصرية كلها اتملت بالجماهير والمشجعين وأعلام مصر. في مباراة النهائي، اللي لعبتها مصر مع ساحل العاج، وكسبنا في ضربات الجزاء 4-2 بسبب عصام الحضري اللي تصدى لضربات الجزاء، ووقتها اللاعبين كلهم أول ما انطلقت صفارة الحكم انقضوا على “السد العالي” علشان يحتفلوا به ومعاه، ومن هنا أُطلق عليه لقب “السد العالي”.
جائزة أفضل حارس في كأس الأمم الأفريقية في تلات نسخ متتالية
الأمم الأفريقية في 2006 كانت بشرة خير للحضري، ولعب أقوى مباريات في تاريخه في النسختين اللي بعدها، علشان يفوز بجائزة أفضل حارس في البطولة في 3 نسخ متتالية، 2006 و2008 و2010. وفي مسيرته كاملة، حقق اللقب 4 مرات، بإضافة اللقب اللي حققه في أمم أفريقيا 1998 على الأرقام المتتالية اللي فاتت.
وده رقم قياسي تاريخي ماحدش حققه غير الحضري، وبكده هو أكتر حارس تتويجًا بلقب أمم أفريقيا، والمباريات وقتها كانت وما زالت من أمتع مباريات كرة القدم المصرية اللي الناس لحد دلوقتي بترجع تتفرج عليها حتى بعد ما عدى عليها سنين.
جدير بالذكر كمان إن الحضري حقق لقب أكثر حارس مشاركة في نهائيات أمم أفريقيا، برصيد 28 مباراة.
أهداف الحضري
حارس مرمى بيسجل أهداف؟ ده حقيقي مع السد العالي.
الحضري حقق في مسيرته 5 أهداف، أشهرهم واللي دخل به التاريخ كان هدفه في مرمى فريق (كايزر تشيفز) الجنوب أفريقي، اللي سجله من وسط ملعب النادي الأهلي، واللي أحرزه على بُعد 85 متر تقريبًا، والهدف ده اتقال عليه “هدف عابر للقارات” والمباراة كانت في 2002.
أكبر حارس مرمى في كأس العالم
من أواخر الألقاب التاريخية اللي حققها الحضري في مسيرته، كان بمشاركته في كأس العالم 2018 مع المنتخب المصري، وحقق “أكبر حارس مرمى في كأس العالم” بعد ما تصدر قائمة اللاعبين اللي تم ترشيحهم للمشاركة في المونديال، وبكده يعتبر اللاعب الأكبر مشاركة بالمونديال في تاريخه، بعمر 45 سنة و161 يوم، وده خلال نسخة 2018 فى روسيا.
الحضري كسر الأرقام القياسية اللي قبله بعد ما ناس كتير ظنت إنه من الصعب تحطيمه، قبل ما يظهر حارس منتخب مصر عصام الحضري في 25 يونيو 2018، وشارك كلاعب أساسي في الدور الأول قدام منتخب السعودية.
وبكده بقى أول لاعب كرة مصري يدخل موسوعة جينيس للأرقام القياسية، لكونه أكبر لاعب سنًا يشارك في مونديال كأس العالم.