محصول البلح يعتبر من المحاصيل الاستراتيجية في مصر اللي بعتمد على زراعته مناطق كتير، وبتتصدر أرقام كبيرة منه بتعتبر الأولى عالميًا، وبالإضافة لكده، في ناس عرفت قيمته من الألف إلي الياء وعرفوا إزاي يستغلوا كل جزء من ثمرة البلح ونخلها، وبيعملوا مشاريع صغيرة وصناعات بإيديهم يتميزوا بيها عن أي حد تاني، زي صناعة الأقفاص، والقفف، والمقشات من خوص وسعف النخيل، والأكلات اللي بتعتمد على ثمرة البلح زي عسل البلح، والعجوة، والبن من نواة البلح.
صناعة الأقفاص من الجريد وخوص النخيل
عود مع عود، وعود عكس عود، بيطلع القفص المصنوع من نخيل بلدنا. في البداية بيتم تقشير وتجفيف الجريد في الشمس علشان يكون جاهز للتصنيع، وبيتقطع بعدها لقطع صغيرة، بفن وتنظيم مُعتمد على الدقة في ثقب الجريد أو الخوص وتقطيعه، وتركيبه بمسافات معينة وبطريقة لتكوين الأقفاص. ولازم يكون في دقة في الترصيص والصنع علشان يطلعلنا في النهاية منتج متين يستحمل الاستخدام في أغراض متعددة زي تعبئة الخضروات والفاكهة.
صناعات يدوية من سعف النخيل
سعف النخيل الناشف بيستخدم في صناعات يدوية كتير، زي صناعة الكراسي، والمراوح، والمكانس اليدوية، وصناعة أطباق القش. وبيستخدم كمان في صنع النشارة، وفي الحرف اليدوية المنسوجة، زي القبعات، والحصير، وسلال حفظ الفواكه، والبيض.
صناعة البن من نواة البلح
في منطقة سقارة، بيعتمدوا على صناعة بسيطة مش ناس كتير تعرفها، وهي صناعة بن القهوة من نواة البلح عن طريق تجميع نواة البلح وغسلها كويس عدة مرات، وبعد كدة بيسيبوها تنشف في مكان مُشمس. وبعدين بيحطوهما في الفرن لمدة تلت ساعة، وبتطلع بعدها النواة شبه لحبوب البن العادي، وبعد كدة بتطحن وبيتضاف لها تحويجة البن العادية حسب الرغبة، وبنستعمله في عمل قهوة مختلفة ولذيذة ومفيدة للصحة من غير كافيين.
صناعة مأكولات متعددة من البلح
غير إننا بناكل البلح زي أي نوع فاكهة عادي، الستات في سقارة بيصنعوا حاجات كتير للأكل من البلح، زي المربى اللي بيعملوها من البلح بعد ما يضيفوا عليه السعل الإسود، مع شوية مياه وبيتساب على نار هادية وبعدها يتضاف ليه القرفة، فيبقي عندنا منتج نهائي يعتبر علاج لأمراض نقص الحديد والأنيميا، وغني بقيمة غذائية عالية، غير طبعًا طعمه الحلو. وعلشان نقدر نحتفظ بالمربى دي مدة طويلة، بيتضافلها معلقة من الزيت على الوش.
كمان بيعملوا دبس البلح أو عسل البلح بطريقة بسيطة، ففي البداية بيتم غسل البلح كويس بعد ما نشيل منه النواة، وبعدين بنحطه في مياه ويتحط على نار متوسطة لحد ما يغلي، وبعد كدة بنوطي النار و نسيبه لمدة ساعتين أو تلاتة لحد ما يبقي صالح للهرس، ومننساش طول مدة الطهي على النار نزودله المياه كل ما تتبخر وينشف. وبيُستخدم دبس البلح أو عسل البلح في وصفات كتير منها الفطير بالبلح، اللي مش هتلاقيه في أي مكان غير في سقارة.
ومينفعش ننسى العجوة المصنوعة من البلح اللي بتستخدم في صنع حلويات كتيرة بإضافة السمسم والمكسرات ليها، وبيقدموها للأطفال كحلوى لذيذة ومفيدة وفيها قيمة غذائية عالية.