معظمنا (لو مش كلنا) عنده شخصية كرتونية مُحببة لقلبه وكان دايمًا وهو صغير بيختار إنه يجسد الشخصية دي ويلبس الزي بتاعها في حفلات المدرسة التنكرية. مين من البنات ملبستش فستان سيندريلا مثلًا، ومين من الولاد ملبسش رداء سوبر مان الأحمر وراء ظهره وتخيل نفسه بيطير؟ ها إفتكرتوا طفولتكم دلوقتي؟ لو آه، فتخيلوا بقي لما يتعرض برنامج جديد للأطفال على أرض الواقع مجمعلهم كل شخصيات ديزني وغيرها من اللي بيحبوهم. مش بس كده، لا دول كمان هيبقوا جيرانهم في شقة بشبرا، وبنسخة بنت بلد زيهم. إيه ده أنت بتعيط..؟
دورز كيدز أنتجت المشروع ده بالتعاون مع مسرح سيتارا، واللي هيكون في شكل مسلسل علي قناتهم على اليوتيوب. والمسلسل بيضم نخبة من النجوم الشباب، ومن ضمنهم الفنانة الكوميدية إيمان السيد. وفكرة البرنامج باختصار هي إنهم عملوا نُسخ شعبية من شخصيات الكرتون المعروفة علشان يضيفوا الروح العربية المرحة على الشخصيات ويسعدوا بيها الأطفال. والبرنامج هيستهدف الأطفال من سن 3-8، بس مش هنستغرب لو لقينا شوية شباب دخلوا في شريحة المشاهدين.. الموضوع لذيذ أوي بصراحة!
البرومو نزل وأول حلقة من المسلسل هتنزل في خلال كام يوم، وده حرصًا من القناة على إنها توفر للجيل الحالي أنواع برامج أطفال مختلفة عن التقليدي وعن اللي متعودين يشوفوه. فلو عندك طفل (أو لو انت شخصيًا قلبك طفل) ننصحك إنك تزور موقعهم، وتتفرج علي برامجهم المختلفة للأطفال، وتستنى أول حلقة من جيران جنان تنزل.