يوم 29 من شهر سبتمبر بيوافق ميلاد الفنان أحمد مالك. وطبعًا بعد ما نتمناله عيد ميلاد سعيد (كل سنة وانت طيب يا فنان)، حبينا نتكلم عن أبرز أعماله في مشواره الفني اللي ممكن ميكنش طويل لصغر سنه، ولكنه بالتأكيد مهم ومؤثر.
أحمد من الفنانين اللي كبروا وسط الناس وقدام الشاشة، وده لأنه بدأ تمثيل من وهو عنده 10 سنين في مسلسل أيامنا، وآخر أعماله كان فيلم رأس السنة سنة 2020. وبمرور السنين، شوفنا تطور كبير في أدائه التمثيلي، وكمان في اختياراته للأدوار. والجدير بالذكر إن معظم الأفلام والمسلسلات اللي شارك فيها مالك (لو مش كلها) بتبقي من أنواع الأعمال اللي بتعمل ضجة كبيرة لما بتنزل وبتحقق نجاحات ساحقة. فتعالوا ناخدكم في رحلة سريعة نفتكر بيها الطريق اللي مشي فيه مالك، وأبرز المحطات في حياته الفنية اللي شارك فيها مجموعة من أكبر وأنجح الفنانين، واللي خلت كتير من الممثلين الصاعدين ياخدوا منه الإلهام في طريقهم للوصول للشهرة.
مع سبق الإصرار
رغم إن ده مكنش أول ظهور لمالك، فهو كان ظهر قبلها في أدوار بسيطة في مسلسل الجماعة، وفيلم جدو حبيبي، وفيلم مفيش فايده، بس سنة 2012 كانت سنة فارقة في مشواره الفني لما ظهر بجانب الفنانة غادة عبد الرازق في دور قوي ومؤثر كشاب مدمن وعنده صعوبة في التخاطب. ودي كانت بتعتبر شهادة ميلاده الفنية اللي لفت بيها انتباه الجمهور، فالدور كان صعب وبيتطلب شغل ومجهود كبير، بس مالك قدر يعمله بطلاقة على الرغم من صغر سنه وقتها. وده بردو اللي خلى غاده عبد الرازق تقول عليه “نجم مصر القادم”.
حكاية حياة
بعد الكيمياء بين مالك وغادة عبد الرازق اللي كانت واضحة على الشاشة، والنجاح الكبير اللي حققه مسلسل مع سبق الإصرار وقت عرضه، اتفتحت السكة لمالك إنه يشارك غادة مرة تانية وبدور أكبر في موسم رمضان 2013 في دور أدهم، اللي كان من المفترض إنه إبن غادة بس هو ميعرفش في المسلسل، وفي المشاهد اللي جمعت بينهم بتبدأ الأحداث تتصاعد ما بين محاولتهم إنهم يتأكدوا هل هي أمه بالفعل ولا لأ.
فيلم الجزيرة 2
في سنة 2014، شارك مالك في أحد أهم الأفلام وهو الجزيرة 2 اللي كان مستنيه الجمهور بفارغ الصبر بعد نجاح الجزء الأول من الفيلم. فمشاركة مالك في فيلم كبير زي ده مع نجوم كبار زي أحمد السقا وهند صبري هي كل اللي يحلم بيه أي شاب بيبدأ مشواره الفني، وأضاف الفيلم كتير لرصيد مالك.
فيلم أهواك
شارك مالك السنة اللي بعدها في فيلم أهواك من بطولة تامر حسني، اللي طلع فيه في دور سيف إبن أخت تامر. والدور كان مختلف، فمالك ظهر (عكس أدواره اللي اتعرف بيها) في شخصية الولد الساذج اللي أمه بتتحكم في كل حياته ومبيقدرش يعمل حاجة بنفسه. وخلال الفيلم بنشوف إزاي بيحاول سيف إنه يخرج من الشخصية دي ويعتمد على نفسه أكتر.
فيلم هيبتا
مين فينا مكنش مهووس بالفيلم ده لما نزل؟ فهيبتا المحاضرة الأخيرة قعد لفترة مش قليلة حديث السوشيال ميديا. وكان الفيلم بيضم نخبة كبيرة ومحبوبة من النجوم الكبار اللي اتجمعوا في لوكيشن واحد وخرجولنا تحفة فنية الكل بيحبها لحد النهارده. وثنائي مالك وجميلة عوض كان من أكتر الثنائيات اللي الناس حبيتها وتعاطفت مع قصصها في الفيلم، خصوصًا المراهقين لأنهم كانوا بيمثلوا الشريحة والفئة العمرية دي بالذات.
مسلسل لا تطفيء الشمس
في موسم رمضان لللي اتعرض فيه المسلسل المقتبس من رواية إحسان عبد القدوس، مكنتش بتلاقي حد مش بيتابع المسلسل، والسوشيال ميديا كانت بتلخص موسم رمضان كله في المسلسل ده كأن منزلش غيره من كتر ما كان ناجح. وكمان المسلسل كان جامع لكل النجوم المحبوبة، واللي على رأسهم الفنانة الكبيرة مرفت أمين. ومع إن ده كفاية إنه يخلي مالك يحس بالنجاح، ولكن النجاح الأكبر كان إن دوره في المسلسل بيمثل الشخصية المحورية اللي بتدور حواليها أحداث المسلسل، واللي كان الجمهور مستني يشوف قصته هتخلص على إيه.
الكنز 2
تقريبًا معظم الأفلام اللي شارك فيها مالك من النوع اللي بيبقى حديث الناس كلها. فبعد نجاح الجزء الأول من فيلم الكنز، كان الكل مستني إن الجزء التاني ينزل. وعلى الرغم من إن دور مالك مكنش كبير أوي في الفيلم، بس مثله باحترافية خليتنا نصدقه.
وبعيدًا عن تألقه في أعماله الفنية، مالك كمان بيلفت دايمًا الانتباه بمظهره اللي بيهتم بيه دايمًا في المهرجانات والمناسبات العامة، ودي مجموعة من أفضل طلاته اللي أبهر بيها الناس بستايله المختلف:
