كل سنة في يوم 1 من شهر مايو، بنحتفل بالناس الشقيانة، اللي بتصحى كل يوم علشان تجتهد وتجري ورا لقمة عيشها.. هنحتفل بهم بالأفلام اللي سلطت الضوء على دورهم، ولكن قبل ما نتكلم عن الأفلام اللي لازم تشوفها اليوم ده، لازم نعرف إيه القصة من أولها.
القصة بدأت في شيكاغو، لما مجموعة من العمال كانوا بيشتغلوا لعدد ساعات كبيرة بأجر زهيد، فعملوا إضراب علشان يقللوا ساعات الشغل لـ 8 ساعات والمظاهرات والاشتباكات زادت بين العمال والشرطة، واترمى قنبلة قتلت مجموعة من العمال واتسمت وقتها الحادثة دي (مذبحة هيماركت)، ومن وقتها بقى أول مايو عيد للعمال؛ تخليدًا لذكرى المكافحين.
أما عن الأفلام، دي قائمة اتكلمت عن كفاح العمال وقصصهم وأبرزت دورهم.
الأيدي الناعمة
فيلم بطولة صباح وأحمد مظهر وصلاح ذو الفقار، اتكلم الفيلم عن أمير فقد كل ممتلكاته بعد انتهاء فترة الملكية، وهيتعرض بعدها لظروف مادية سيئة تجبره إنه يجيب فلوس بأي طريقة، وهيقترح عليه أحد الشباب إنه يأجر القصر بتاعه لأي أسرة ويعيش معاهم، والأسرة اللي هتأجره هي اللي هتبقى نقطة تحول في حياته، هتعرفه قيمة الشغل، هتحوله من شخص مدلل لشخص مسؤول، ومن بعدها هيقرر إنه يشتغل شغلانات كتيرة وبسيطة منها عامل في زراعة الورود وسائق في الأتوبيس النهري.
الأرض
فيلم من إخراج يوسف شاهين، ولما نقول يوسف شاهين يعنى إنك تبقى مستعد تشوف معاناة حقيقة للأبطال، ونجح في ده فعلًا من خلال تجسيد محمود المليجي لدور الفلاح المصري اللي بيحارب ظلم وفساد الإقطاعيين اللي عايزين يسلبوا أرضه، وقد إيه عانى وحارب علشان يحافظ على الأرض بدمه. الفيلم كان من أهم أفلام السينما المصرية وورى أهمية الأرض معنويًا قبل ما تكون مصدر رزق أساسي ليهم عايشين حياتهم يكبروا ويراعوا فيه.
للرجال فقط
فيلم أبرز دور المرأة العاملة في وقت كانت مهمشة فيه وبيتقال عليها “دي مكانها في البيت أو في المطبخ” وإن الشغل للرجالة بس، الفيلم أثبت إن المرأة تقدر تعمل حاجات كتير حتى الشغل اللي مكتوب عليه يافطة “للرجال فقط”، قدرت تنجح فيه وراحت الصحرا والبريمة طلعت البترول، الفيلم من بطولة سعاد حسني ونادية لطفي وحسن يوسف وإيهاب نافع.
النمر الأسود
ظهر فيه أحمد زكي بدور الشاب المكافح اللي هاجر ألمانيا علشان يثبت نفسه ويحقق أحلامه، واجه صعوبات وتنمر كتير واتنقل من شغلانة لشغلانة، اشتغل في مجال الخراطة وبعدها احترف الملاكمة لحد ما حقق نجاح كبير ولقبوه في ألمانيا بالـ “نمر الأسود”. واللي الناس ماتعرفوش إنه عن قصة حقيقة وده بيورنا إن السينما مرآة للواقع ومش مجرد قصص خيالية على الورق.
فتاة المصنع
فيلم بطولة ياسمين رئيس وهاني عادل وإخراج محمد خان، الفيلم بيتكلم عن مشاكل وقضايا عاملات مصنع للملابس والأقمشة. مشاكل ممكن تكون تبان بسيطة بس مهمة وحقيقة بالنسبة لتقاليد البيئة وأعرافها اللي عاشوا واتربوا فيها بالنسبة لهم من خلال الشخصية الرئيسية هيام واللي بتقوم ببطولتها ياسمين رئيس.
أفواه وأرانب
وتوتة توتة خلصت الحدوتة.. فيلم تاني أبرز دور المرأة العاملة وكمان مشكلة الزيادة السكانية من خلال شخصية نعمة اللي جسدتها فاتن حمامة، واللي هتتولى رعاية أسرة أختها وهتقوم بتكفلهم ماديًا. علشان كده هتدور على شغل في مزرعة محمود بيه، وهيكتشف مهاراتها في الشغل وبعدين هيعينها مساعدة في إدارة أعمال المزرعة.
لو في أفلام تانية سلطت الضوء على حياة العمال وعجبتك يارت تقول لنا.. نحب نوجه كلمة أخيرة لكل شغيل وعامل شقيان وطلعان عينه.. افتكر القيمة المعنوية اللي بتتحقق لك من الشغل قبل المادية هتساعدك تكمل طول ما تحس نفسك تعبان ومش قادر تكمل.