مين فينا بيقدر يعيش من غير أفلام؟ فالأفلام هي ملجأنا في كل الأوقات، لو بنقضي وقت كويس مع أصحابنا أو أهالينا أو حبايبنا، أو بنقضي وقت تعيس، أو لو زهقانين، والأفلام هي ثقافة منتشرة في العالم كله، وبنتفرج عليهم بكل أنواعهم وبلاد إنتاجهم مهما كانت جنسياتنا أو لغاتنا اللي بنتكلمها، وفي أفلام كتير مصرية بيتقال عليها إنها متقلدة من أفلام أجنبية، ولكن رغم إن قصصهم ممكن تكون متشابهة بحد كبير، ولكننا فكرنا في إن الأفلام دي ماكناش هنعرف نتفرج عليها غير بالطابع المصري ولا كنا هنعرف نضحك عليها غير بالإفيهات المصرية، أو نحس بيها غير بالروح والدراما المصرية، فتعالوا نشوف إيه الأفلام الشبيهة بالأفلام الأجنبي اللي أقنعتنا بالقصة بالطابع المصري.
طير انت
طير انت ممكن يكون شبيه لفيلم Bedazzled، ولكننا إزاي كنا هنقدر نضحك من غير الحس الفكاهي بتاع ماجد الكدواني، أو انسجام الفنانين أحمد مكي ودنيا سمير غانم مع بعض.
ألف مبروك
ألف مبروك من أكتر الأفلام اللي بتضحكنا للفنان الكبير أحمد حلمي، وكتير بيقولوا إنه شبه فيلم Groundhog Day، ولكن فيلم ألف مبروك بكل حاجة فيه من مشاهد لأبطال خليته أكتر من مثالي.
حد سامع حاجة
كتير قالوا إن الفيلم ده بيشبه فيلم Stranger Than Fiction ولكن إزاي كنا هنقدر نتفرج على الفيلم ده من غير رامز جلال وإفيهاته.
التوربيني
فيلم التوربيني بيشبهوه بفيلم Rain Man ولكن أبطال الفيلم ده من أحمد رزق وشريف منير وهند صبري عملوا ميكس رائع في التمثيل والأداء اللي عملوه مع بعض.
الحاسة السابعة
ناس كتير بتقول إن فيلم الحاسة السابعة شبه فيلم What Women Wants، ولكن فيلم الحاسة السابعة هو أيقونة في السينما المصرية وعمرها ما بتتنسي وهيفضل عايش في دماغنا على طول بأداء أحمد الفيشاوي اللي كان أكتر من عظيم.
الحرب العالمية التالتة
فيلم الحرب العالمية التالتة اللي بيضحكنا كلنا وكل لما نتفرج عليه نموت من الضحك كأننا أول مرة نتفرج عليه بيشبهوه بفيلم Night At The Museum، ولكن كنا هنطلع بالإفيهات دي إزاي من غير الفيلم؟
جوازة ميري
فيلم جوازة ميري بيشبهوه بفيلم This Means War ولكن طبعًا الطابع المصري اللي اتضافله خلانا نحس فيه بالروح المصرية نتفرج عليه بمزاج.