الحقيقة مش بس في رمضان، لما ناس كتير تتفق على عمل فني وتحبه وتتابعه، وتلاقي في النص ناس بتتفرج وتجري تحرق أحداث المسلسل على السوشيال ميديا والناس ماتلحقش تشوف الحلقة الجديدة، وتلاقي نفسك عرفت الأحداث بطريقة باردة من غير ما تشوف الحلقة بكل أحداثها وتفاصيلها اللي بتخليك أساسًا مستمتع بالمشاهدة، أما في رمضان، اللي يعتبر موسم للمسلسلات العربية وبنشوف فيه عدد كبير من المشاركة الفنية لنجوم بمختلف الأعمال وأنواعها، فطبعًا نلاقي ناس كتير تتفرج على أول عرض للحلقة في اليوم وتحرق الأحداث على السوشيال ميديا.
مش هننكر إن الميمز والكوميكس اللي بتتعمل دايمًا على أحداث المسلسلات بيبقى دمها خفيف، وناس كتير بتتبسط لما بتشاركها مع بعض وهما بيتفرجوا على نفس المسلسل، لكن إننا نلاقي الميمز والحرق انتشروا قبل حتى ما الناس تلحق تشوف الحلقة، ده اللي بيبقى دمه تقيل.
طب حتى استنوا لما اليوم يعدي كامل، والناس كلها تكون شافت الحلقة في الميعاد اللي يناسبها، علشان مش كل الناس بتشوف الحلقة في العرض الأول ليها، وعلشان كده اخترعوا مواعيد الإعادة، واخترعوا كمان أبليكشنز الناس تقدر من خلالها تتفرج على الحلقات في الوقت اللي يعجبها. علشان كده، ياريت الناس تستنى على الأقل 24 ساعة علشان يقولوا وجهة نظرهم وتحليلهم الشخصي والفني للأحداث الدرامية من غير ما يبوظوا على غيرهم متعة متابعة العمل الفني نفسه.
كمان في اختراع جميل ناس كتير بتتبعه، وهو تحذير صغير كده في بداية البوست، إن البوست في حرق للأحداث، علشان اللي ماتفرجش على الحلقة يعمل skip للبوست ببساطة، وبكده حققنا احترام حرية الرأي من الناحيتين، أنت كتبت وجهة نظرك أو تحليلك الفني من وجهة نظرك للأحداث، واحنا نتفرج وقت ما نحب من غير ماتحرقلنا الأحداث.
ده غير إن في ناس بتحب تتفرج على المسلسلات مرة واحدة بعد شهر رمضان أصلًا، منهم الناس حريفة المسلسلات، الأبطال اللي بيخلصوا بالخمس ست حلقات في اليوم، ليه نبوظ عليهم الدنيا بقى؟ ولا شكلهم كده هيضطروا يقفلوا السوشيال ميديا طول الشهر علشان يتفادوا حرق الأحداث.