زيّ ما اتعودنا كل سنة، موسم مسلسلات رمضان بيبدأ وبيبدأ معه الجدل والدوشة على المحتوى المُقدم وأسلوب الطرح، والنقاد بيبدأوا في تحليلاتهم عن مستوى الأداء، والجمهور كمان بقى له دور كبير وحصة مش قليلة في تقديم نقد لاذع عن اللي بيشوفوه على الشاشة. ومع انتشار السوشيال ميديا مابقاش الموضوع مجرد ماراثون رمضاني النجوم بيقدموا فيه محتوى للتسلية وبس، الجمهور بقى له سلطة في إنه يوقف أو يمنع محتوى من الظهور على الشاشة، وده وفقًا للضوابط والمعايير اللي بيحطها الجمهور لنفسه وبيرفض أي تغيير فيها، والمجلس الأعلى للإعلام هو واحد من المؤسسات اللي بتحرص على وضع المعايير دي وتطبيقها كل سنة في رمضان.
طب إيه أهم الضوابط اللي تم وضعها بخصوص مسلسلسلات رمضان 2022
- البعد عن الشتايم والإيحاءات الجنسية والسب، واللي أحيانًا كتير أوي بيخرجوا برا السياق الدرامي.
- لما يتطلب السياق الدرامي إنك تعرض صورة حد بيدخن، ماتحاولش وإنت بتعرضها إنك تحبب الشباب في التدخين وتظهر إن ده شيء عادي ومقبول اجتماعيًا.
- ماينفعش نطلع البلطجية في صورة أبطال والناس تحبهم وتمشي تقلدهم في الشوارع، ماتظهرهومش بصورة غير صورتهم الحقيقية، أظهر الناس المسيئة بصورة مسيئة زيّ ما هما في الواقع، وماتحاولش تمجدهم لما ترسمهم في صورة أبطال وهمية.
- مش عايزين إعلانات خيرية فيها نبرة “الشحاتة” علشان نستعطف الناس إنهم يتبرعوا، ماينفعش نهين الشخص المريض.
- لازم نرجع لأصحاب العلم والدين في حالة تضمين المسلسل لنصوص دينية أو علمية أو تاريخية.
- غير مقبول إنه يتم إهانة المرأة بأي شكل من الأشكال، ماينفعش تبقى سلعة جنسية أو يتم التقليل منها أو اعتبار ضربها شيء عادي ومقبول على الشاشة.
- تقديم محتوى يحترم عقل المشاهد، ويرتقي بالذوق العام، ويبقى فيه متعة وترفيه بعيدًا عن الإسفاف.
في سنة 2020، تم رصد مخالفات وتجاوزات كتير لمسلسلات رمضان، وكان أكتر أنواع التجاوزات في معظم الأعمال هو استخدام ألفاظ متدنية وسوقية ومخالفة كود الطفل في المسلسلات الكوميدية، لإنهم كانوا بيصطنعوا لغة حوار بين الأب والابن بطريقة غير لائقة ومش مناسبة، بجانب تشويه صورة المرأة من خلال مشاهد عنف وضرب بالقلم وبتتاخد على محمل الهزار زيّ إنه “كان بيصبح على مراته بقلمين على وشها”.
ووقتها، في نفس السنة، اتوقف إعلان قطونيل بسبب استخدامه إيحاءات جنسية، ده غير البرامج الحوارية اللي كانت بتطلع ونص كلامها ماكنش ينفع يتقال على شاشة. وتقدر تشوف كل ده من خلال تقرير رصد ملاحظات دراما رمضان 2020، اللي صدر عن المجلس الأعلى للإعلام، من هنا، وتقول لنا رأيك.
وعلى الجانب التاني، كان في مسلسلات من أول أسبوع ماتمش رصد أي مخالفات لها، وتقدر تعرف هما مين برضه من هنا.
الضوابط والمعايير اللي تم وضعها من المجلس الأعلى لتنظيم الإعلام كانت موجودة من قبل كده وبدأ تطبيقها مؤخرًا، بس ياترى مع تطبيقها هنشوف السنين اللي جاية موسم رمضاني خالي من أي محتوى مبتذل أو إسفاف ولا لأ؟