في الحر والرطوبة وأشعة الشمس، مهم نحافظ على بشرتنا وشعرنا من أضرار الصيف ومشاكله اللي ممكن مانبقاش حتى واخدين بالنا إنها بتحصلنا بسبب الحر والرطوبة والشمس. وعلشان نستمتع بالصيف والبحر والجو براحتنا من غير أضرار، في نصايح بسيطة وحاجات لو خدنا بالنا منها ممكن نقضي الصيف بشعر صحي.
المحافظة على الشعر متغطي
في وقت ما تتعرض لأشعة الشمس، ممكن تحمي راسك بكاب أو أي طاقية تكون واسعة شوية علشان تحمي فروة الراس والشعر من الأشعة فوق البنفسجية اللي بتضر الشعر، وفي نفس الوقت الطاقية تكون واسعة شوية لتغطية أكبر، ويفضّل تكون بلون فاتح علشان الألوان الغامقة بتجمع أشعة الشمس.
شرب المياه
كلمة تقليدية دايمًا نسمعها خصوصًا في الصيف وبنقابلها بالتجاهل، لكننا مانعرفش مدى أهميتها حتى في الحفاظ على شعرنا، شرب المياه بيحافظ على رطوبة الشعر وبيحافظ على الفروة قوية ورطبة للتأثير بشكل إيجابي على النمو وعلى إصلاح الشعر.
لو بتفكري في الصبغة، بلاش في الصيف
فترة الصيف بتيجي علينا برغبة في تغيير لون الشعر وإننا نعمل تغيير كده، بس للأسف الصبغة بتضر الشعر خصوصًا في فترة الصيف لإن الصبغة في العادي بتضر الشعر وكمان الشمس بتأثر على الشعر المصبوغ وبتخليه هش وبيعاني من التقصف والتساقط. فالاتنين مع بعض هيبقى دمار شامل على الشعر.
قص الأطراف في بداية الصيف
كل فترة بيكون ضروري نقص أطراف الشعر علشان نحافظ عليه صحي وقوي، وبالذات في الصيف مفروض نقص أطراف الشعر مع بداية فصل الصيف للوقاية من الجفاف اللي بيصيب الشعر، وكمان نعمل حمامات كريم ونستخدم بلسم علشان نحافظ على الترطيب.
التخفيف من استخدام الحرارة
الأفضل نقلل من استخدام الحرارة سواء كانت بسيشوار أو مكواة في فترة الصيف لإنها بتتلف الشعر خصوصًا مع التعرض لأشعة الشمس، فده هيؤدي لجفاف وتقصف الشعر بشكل مضاعف. ولو استخدمنا الحرارة وعايزين نخرج في الشمس، من الأحسن نلبس طاقية أو حاجة تحمي الشعر من الشمس.
عدم غسل الشعر بشكل يومي
طبيعي من الحر والرطوبة نحس إننا عايزين نستحمى ونغسل شعرنا أكتر من مرة في اليوم علشان ده بيحسسنا بالترطيب والانتعاش. لكن غسل الشعر يوميًا بيضره مش بينفعه، لإن المياه ومنتجات الشعر بتضره لو استخدمناها بشكل يومي، وده كمان بيخلّي الشعر يفقد الزيوت الطبيعية اللي بيفرزها علشان تحميه.
الحاجات دي هتقلل من الأضرار اللي ممكن نتعرض لها بسبب الشمس والحر والرطوبة، بس كمان لو حافظنا على الترطيب حتى بعد الصيف هنوصل لشعر صحي.