للأفراح في الصيف: تسريحات شعر مختلفة من غير ما نضطر نروح للكوافير

في موسم الأفراح اللي احنا فيه في الصيف، خصوصًا الأفراح اللي بتتعمل في أماكن مفتوحة وبتبقى بأجواء صيف وشمس وممكن كمان على البحر، فطبعًا مع الرطوبة والهواء، قولي على شعرك يا رحمن يا رحيم، هتقرفي نفسك أنتي وشعرك وتعمليه بحرارة وبعدها بربع ساعة تلاقيه باظ وهايش وتكتشفي إنك ضريتي شعرك على الفاضي، فاحنا ممكن نضرب عصفورين بحجر، نحافظ على شعرنا من الحرارة، وفي نفس الوقت نواكب الأجواء الصيفية والبحر والحرية دول.

علشان كده هنقولكم على تسريحات شعر مختلفة نقدر نعملها في الأفراح من غير ما نضطر نروح كوافير أو نعرض شعرنا للحرارة، أيًا كان نوع شعرك، كيرلي أو ويفي أو حتى مفرود. أينعم دلوقتي لسه بنبتدي فكرة إن الناس تبقى بشعرها على طبيعته ونتقبل الطبيعة دي، خصوصًا في المناسبات، بس عايزين نشوف حاجات تشجعنا على ده.

ممكن نستغل موضة الحاجات اللي بتتحط على الشعر دي والطوق الورد والموضة دي، في إننا نلم جزء من الشعر بطريقة شكلها حلو ونحافظ عليه، وفي نفس الوقت مش هتلاقي شكله أتغير بعد أول ربع ساعة رقص وتنطيط في الفرح، لإنك نوعًا ما لامة شعرك ومحافظة على شكله. الطوق الورد ده بيتباع في كل حتة دلوقتي وممكن تشتريه من أي محل مستحضرات تجميل ومستحضرات للشعر، وكمان في صفحات كتير على إنستجرام لناس بتعمل التوك والطوق ده يدوي، وبأشكال مميزة، وطريقة لبسه بسيطة، زيّ كده:

عن: هي

ممكن بعد ما تربطي شعرك بأي شكل حباه، بعد ما تلميه، تثبتي التوكة دي أو الطوق عليه باستخدام بنس للشعر، وتحطيه بالطريقة اللي تشوفيها لايقة عليكي؛ تحطيه على الجنب أو في نص الضفيرة، وممكن تشوفي الفيديو ده علشان تاخدي منه أفكار.

وممكن ندي فرصة للأناناسة ونخرجها برا الخانة اللي احنا حاطينها فيها، وإنها لوقت النوم بس علشان تحافظ على الكيرلز. في الحقيقة الأناناسة شكلها بيبقى حلو وممكن نجرب نعملها في أفراح عادي.

في تسريحات شعر بتبقى بسيطة وفي نفس الوقت شكلها حلو ولايق على المناسبات، والجميل فيها كمان إنها بتحافظ على شكل الشعر، مع إنها ممكن نستغل فيها كام خصلة كده عشوائيين يعملوا شكل حلو.

عن: supermama

الضفاير عمرها ما خذلتنا برضه، مش هتضر لو لمينا شعرنا كله بضفاير، أو عملنا نصه في ضفيرتين مثلًا وسيبنا الباقي، أو قسمناه من قدام بضفاير صغيرة ولمينا باقي الشعر لتحت.

عن: aljamila

وعلشان تعرفي ازاي تعملي الضفاير الكبيرة اللي بتلم الشعر كله، وتعمليها لنفسك بطريقة سهلة، شوفي الفيديو ده

وفي كمان أروش تريند موجود دلوقتي وبنشوفه كمان على فنانات كتير؛ لوك الشعر وهو مبلول، الجملة تبان غريبة بس اللوك الفريش ده بيليق جدًا على أجواء الفرح اللي على البحر في الصيف كده، وممكن تستخدمي منتجات بتحافظ على رطوبة الشعر أو منتجات تثبته زيّ الجل.

عن: fustany
عن: hnarab

أخر كلمة: ماتفوتوش قراءة: موسم الأفراح ٢٠٢٢: من وحي فستان جريس كيلي لتصميمات إيلي صعب

تعليقات
Loading...