العيد بيهل علينا والناس بتنقسم لتلات أنواع؛ ناس بتسافر برا القاهرة أو حتى برا مصر، وناس بتخرج وتستحمل الزحمة بتاعت العيد وبتستحمل الفسفورك الكتير، وناس تانية خالص بيتوتية وبتقضي طول العيد في البيت. وبصفتي واحدة من الناس البيتوتية، حبيت أكلمكم عن خلاصة 23 سنة بقضيها في البيت.
اقعد على كنبتك وشوف مسرحياتك المعتادة
هي حاجة كليشيه أوي بس لازم كل سنة نشوف نفس المسرحيات اللي من كتر ما احنا شوفناها حفظناها وبنضحك عليها كل مرة كإنها أول مرة، بنبقى حافظين الإفيه من قبل ما يتقال، ومين يقدر ينسى مسرحية “المتزوجون” و”سك على بناتك “و”مدرسة المشاغبين” و”عفروتو” و”كده أوكيه” و”سكة السلامة” و”العيال كبرت”.. كحكك وبسكوتك وترمسك وعيش على الكنبة في العيد.
اتعرف على أهلك
الإجازات والمناسبات فرصة كويسة للعيلة ولمة العيلة، ويمكن تكون هي دي الفرصة الوحيدة اللي بتقعدوا فيها مع بعض. لو قعدت معاهم أسبوع كامل من غير خروج، ممكن تكتشف حاجات جديدة في شخصياتهم ماكونتش تعرفها عنهم وهما كمان، ممكن تدخلوا في حوارات ماتكلمتوش فيها قبل كده، زيّ إن مامتك ممكن تكتشف أخيرًا إنك مابتحبش السبانخ، وإنك بتحب تسيب شوية كفتة على جنب قبل ما يتحطوا في الصلصة.
مخمخ في المطبخ
آن الأوان إنك تطلع كل وصفات الأكل اللي راكنهم عندك وقربوا يحمضوا، وتبدأ تجرب فيها وتعيش في المطبخ وتختبر قدراتك في فنون الطهي، جرب الافتكاسات والحاجات الجديدة، بالذات إن اليوم في العيد بيبقى طويل ولازم تستغله. ولو عطلت في مقادير وصفة معينة، عليك وعلى كتب أبلة نظيرة وفيديوهات الشيف الشربيني.
عيد على عيلتك واحد واحد
في عصر الفيس بوك والسوشيال ميديا المعايدات بقيت أسخف بكتير، فيها إيه لما تاخدلك ساعة في اليوم تعمل مكالمة تكلم بيها ناس من عيلتك ماتعرفش عنهم حاجة من سنة؟ هتلاقي ناس أتجوزت وناس أتولدت وناس أتطلقت، هتكتشف حاجات جديدة عن شجرة عيلتك.
اقرأ كتب وشوف الدنيا
شوف الكتب اللي كنت محوشها وعمال تدفع فلوس فيها بقالك سنة وشايلها معاك في كل حتة، آن الأوان إنك تقرأها، ولو ماعندش كتب أصلًا ممكن تنزل كتب إلكترونية، بس أنصحك بالكتب الورق لإنها بتبقى ممتعة أكتر وبتعيشك جو ستيناتي كده.
نااااااام..
لو صحيت من النوم نام تاني، نام تاني وتالت، الإجازة دي فرصة ماتتعوضش، نام وعوض ساعات السهر في الشغل والـover time(ساعات الشغل الزيادة) وقعدة المكتب اللي كانت بتقصف ظهرك..
حاجة أخيرة حابة أقولهالك علشان ماتقولش إني خبيت عليك.. مع الأزمة الاقتصادية اللي بنعيشها واللي داست على العالم كله، فقعدة البيت بقى فيها السبع فوائد زي لو كنت هتسافر برا بالظبط.