في يوم الأحد 13 يونيو 2021، كشفت محكمة القاهرة خلال مؤتمر صحفي تفاصيل كتير عن ألاف القطع الأثرية، من حقب زمنية مختلفة، واللي كشفت عنها الشرطة المصرية داخل شقة في حي الزمالك خلال الأيام اللي فاتت.
لجنة الأثار اللي فحصت محتويات شقة الزمالك قالت إن كان في أكتر من 1204 قطعة أثرية ترجع للحضارة الإسلامية والحضارة المصرية القديمة، وفي حالة كويسة جدًا.
وكمان كان في 787 قطعة أثرية ترجع لأسرة محمد علي، واللي زود عدد القطع الأثرية المضبوطة في شقة الزمالك لـ 2907 قطعة من الذهب والماس والأحجار الكريمة.
وكان في 56 لوحة فنية، قالت لجنة فحص الأثار والفنون إن قيمتها الفنية والمادية عالية جدًا، غير 47 لوحة فنية من الأعمال التجارية، وأوصت اللجنة بعرض 10 لوحات فنية تانية على دار الكتب والوثائق لمعاينتها وتقدير قيمتها.
ولقوا عدد كبير جدًا من السجاد التاريخي والنجف اللي يرجع تاريخه لأسرة محمد علي. وكمان 800 قطعة مجوهرات وسلاح ناري تاريخي ومعاه الذخيرة بتاعته.
ازاي شقة الزمالك دي اتقفشت؟
الحكاية بدأت في يوم عادي جدًا. كان في خلاف مادي على 11 مليون جنيه ما بين النائب السابق خالد محمود وابن المستشار أحمد عبد الفتاح، وخالد محمود رفع قضية على ابن المستشار أحمد عبد الفتاح والمحكمة حكمت لصالحه.
الشرطة راحت لشقة ابن المستشار، اللي اسمه كريم أحمد عبد الفتاح علشان يطبق حكم المحكمة ولقت عنده كنز علي بابا اللي مصر مقلوبة عليه دلوقتي.
وتم تشكيل تلات لجان لفحص وجرد محتويات شقة الزمالك من خلال وزارات الثقافة والمالية والعدل لتقدير قيمة المحتويات وعرضها على الخبراء.