حالة كبيرة من الجدل انتشرت في الوسط الفني العالمي خلال الساعات الأخيرة بعد إعلان الفنانة العالمية “سيلين ديون” إلغاء جولتها الغنائية، ومن المفترض إنها كانت تبدأ في صيف 2023 لحد 2024 في لندن وباريس ودبلن وستوكهولم وبرلين، وده بسبب مرض نادر يسمى “متلازمة الشخص المتيبس” أٌصيبت به في ديسمبر 2022، وبدأت أعراضه تزيد بشكل ملحوظ في الشهور اللي فاتت.
المغنية سيلين ديون نزلت بوست على الانستجرام عبر صفحتها الشخصية، وبتقول فيه أنها قررت تمتنع تمامًا عن الظهور في الفترة الجاية، وبتضطر تلغي جولتها العالمية في أوروبا في اللي كانت بتخططلها من 6 شهور فاتت ومن المفترض كانت تكون أول جولة ليها في العالم لوحدها بعد وفاة زوجها سنة 2016، وقالت: “أنا أسفة جدًا مش هقدر أغني في الوقت الحالي بسبب مرضي، لإنه بيمنعني من القيام بأي جهد على أحبالي الصوتية، أنا مش هرجع إلا لما أكون مستعدة للغناء بكامل قوتي مرة تانية”.
المرض بيمنع سيلين ديون من الغناء نهائيًا وبيجبرها ماتستخدمش أحبالها الصوتية طول فترة العلاج سواء في الغناء أو الكلام بطريقة عادية، والأطباء بيفضّلوا تبتعد عن أي إجهاد في أحبالها الصوتية أو أعصابها زي الزعيق أو الصوت العالي علشان ماتتعرضش لأي مضاعفات.
إيه هي متلازمة الشخص المتيبس وأعراضها؟
متلازمة الشخص المتيبس مرض عصبي نادر غير معروف تمامًا سبب حدوثه حتى الآن، وحسب تقرير المعهد الوطني للاضطرابات العصبية، بيصيب عدد قليل جدًا من البشر في العالم كله بيوصل لشخص واحد من كل مليون شخص، وبيأثر بنسبة كبيرة على عمل الأعصاب بشكل عام، وبترتبط الحالة بالتشنجات العضلية اللي بتكون حادة جدًا وبيبقى صعب نتحكم فيها، وبالتالي بيسبب صعوبة التحكم في العضلات وخاصة عضلات الإيد، سواء الجذع أو الأطراف، كمان بتزيد حساسية الشخص للأصوات والأضواء والاضطرابات العصبية. وفقًا للمعهد الوطني للاضطرابات العصبية والسكتة الدماغية.
وكانت الدكتورة إميلي سامي مخيبر، من مركز متلازمة الشخص المُتَيَبِّس في مؤسسة “جونز هوبكنز ميديسن” قالت في تصريحات صحفية: “كثيرًا ما ترتبط بالتشنجات العضلية، التي يمكن أن تكون حادّة.. ويمكن أن تتسبب بالسقوط، والألم الشديد، وإعاقة كبيرة”.
المرض بيبتدي بالشعور بألم في عضلات البطن والجذع، والشعور بوجود ورم وتضخم في حجمهم بمرور الوقت، وبتبتدي بعد كده مرحلة التشنجات العصبية العنيفة والكفيلة إنها تكسر عظام المريض بمنتهي السهولة.
ممكن الألم يمتد في العضلات لدرجة إن المريض يواجه صعوبة في المشي أو مضع الطعام، وده بسبب إن الأعصاب بقت ضعيفة جدًا وماعندهاش القدرة على تحمل الممارسات البسيطة اللي من المفترض كنا بنعملها بمنتهى السهولة.
متلازمة الشخص المتيبس مش مرض بيتشخص في يوم وليلة، ولكن بيحتاج أكتر من 7 سنين علشان الدكاترة يتأكدوا إذا كنت مصاب به ولا لأ، وبيحتاج لرعاية خاصة جدًا سواء على المستوى النفسي أو العضوي.
طريقة علاج الشخص المصاب بمتلازمة التيبس
للأسف مفيش علاج لمتلازمة الشخص المتيبس لحد دلوقتي، ولكن ممكن نستخدم أدوية وعلاجات بتحد من أعراض المرض بشكل كبير، زي الأدوية المضادة للقلق وأدوية ارتخاء الأعصاب، والمسؤولة عن تقليل الإصابة بتكسير في العظام أو التشنجات اللي بتلازم المريض، ولكن حاليًا بقى في اهتمام كبير من المعامل وشركات الأدوية في إنهم يوصلوا لعلاج حقيقي، خاصة بعد إصابة المغنية العالمية سيلين ديون.
ازاي نتعامل مع مريض متلازمة الشخص المتيبس؟
لازم نتعامل مع المريض بحرص شديد وإننا مانعرضوش لأي ضغط عصبي، أو عصبية زيادة، علشان نقلل من الإصابة بتشجنات عصبية ممكن تؤذي صحته بشكل كبير، والأهم من كل ده إننا ندعمه معنويًا ونفسيًا عشان يقدر يعدي المرض بأقل الخساير.
