نادي الزمالك كانت 2020 لحد قبل كورونا بالنسبة له سنة حلوة لما قدر يكسب الأهلي في السوبر المصري، وبعدها كسب السوبر الأفريقي على حساب نادي الترجي التونسي، تحت قيادة المدرب الفرنسي باتريس كارتيرون، اللي قدر يحقق بطولتين وراء بعض، وبقى فيه ثقة بينه وبين جماهير الفريق الأبيض.. ولكن الثقة دي راحت وبقى فيه غضب كبير من الجماهير تجاه كارتيرون لما ساب تدريب الفريق قبل ماتش نهائي أفريقيا اللي فات بأيام وراح يدرب فريق التعاون السعودي، وظهر وقتها في فيديو مع مرتضى منصور رئيس النادي ساعتها واتحايل عليه إنه يكمل أسبوع بس ويلعب النهائي الأفريقي ويمشي لكن هو رفض وطلب إنه يمشي.
ومن هنا خلاص بقى كارتيرون بالنسبة للجماهير الزمالكوية مغضوب عليه علشان مقّدرش النادي ولا الجمهور وسابه في وقت صعب قبل نهائي بطولة كبيرة زيّ دوري أبطال أفريقيا، وجيه مكانه المدرب البرتغالي باتشيكو، وخسر من الأهلي ساعتها، ولكنه كمل وعمل نتائج كويسة في دوري السنة دي، لكن على مستوى النتائج ماكنتش كويسة، فقرر مجلس إدارة النادي الأسبوع اللي فات إنه يرجع كارتيرون اللي هرب قبل كده، والقرار ده أثار غضب جزء كبير أوي من جماهير الزمالك، وكان أول ماتش ليه امبارح قدام الترجي في دور المجموعات وخسر (1 – 0).. فالجماهير انفجرت على السوشيال ميديا بغضب على إدارة النادي والمدرب بعد ما بقت فرصة صعود الفريق للدور الجاي من بطولة أفريقيا صعبة، فتعالوا نشوف ردود أفعال الجمهور..