بعد انتشار فيديو على السوشيال ميديا لعمال مصريين في ليبيا بيتعرضوا للإهانة والتعذيب على إيد عناصر مليشيا تابعة لحكومة الوفاق الوطني المدعومة من الأمم المتحدة. في الفيديو، المسلحين طلبوا من المصريين يقفوا على رجل واحدة حافيين ويرفعوا إيدهم ويبدأوا يرددوا عبارات مسيئة.
المشهد وجع كل مصري شافوا، ودفع كتير من المصريين على السوشيال ميديا يطالبوا الحكومة المصرية بإنها تتخذ إجراء، الشئ اللي دفع وزيرة الهجرة وشؤون المصريين بالخارج نبيلة مكرم تطلع وتقول في تصريح إن اللي حصل ده مش هيعدي من غير حساب.
الأمم المتحدة أعلنت يوم التلان بإن الفيديو جرس إنذار مُقلق، وإن لازم الحكومة الليبية تفتح تحقيق في وضع معاملة المصريين هناك في أسرع وقت ممكن.
إمبارح الحكومة الليبية في طرابلس أعلنت إنه تم القبض على العناصر في الفيديو اللي كانوا حابسين العمال المصريين وعاملوهم بشكل مش أدمي، وإنه هيتم إتخاذ إجرائات قانونية معاهم. وزير الداخلية في طرابلس وضح بإن الشرطة عرفت مكان الاحتجاز من الفيديو، وتم التعرف على المسلحين، وبسرعة تم القبض على كل المشاركين فيه وتحرير المحتجزين المصريين.
مش بس كدا، الحكومة الليبية في طرابلس وضحت بإن اللي حصل ده بيخالف كل القوانين والأخلاق والأعراف، وإن المواطنين المصريين في ليبيا محفوظة ليهم كل حقوقهم.
مساء الأربع، صور للعمال المصريين ملفوفين بالأعلام المصرية جوا مصر انتشرت على السوشيال ميديا بعد ما عبروا الحدود المصرية الغربية عن طريق السلوم في محافظة مرسى مطروح ورجعوا مصر تاني في إنتصار للكرامة المصرية.
أخر كلمة: لو عاوز تعرف أكتر عن الوضع في ليبيا، متنساش تقرأ: بعد توسط مصر بين الأطراف لوقف إطلاق النار، هل قريب هنشوف ليبيا من غير حرب؟