في الفترة الأخيرة زاد الكلام على احتمالية حدوث الموجة التانية من فيروس كورونا، وبالفعل بدأ يظهر حالات وأعداد من المصابين بكورونا ماكناش بنشوفها بقالنا فترة، وفي بلاد قالت إن ماينفعش نعمل غلق تاني علشان أحوال البلاد، ولكن في بلاد بالفعل بدأوا يطبقوا حظر، وغلق زيّ الأردن، ولبنان، وغرامات زيّ مصر.
فمثلًا في لبنان، أعلن مجلس الدفاع الأعلى برئاسة الرئيس اللبناني ميشال عون بدء الإغلاق العام في لبنان من يوم 14 نوفمبر 2020 لغاية يوم 30 من نفس الشهر، وده علشان يقدروا يسيطروا على الأعداد لإنها في تزايد كبير، وإن الموضوع بقى خطر ولازم يحتووه لإن المستشفيات مش قادرة تستحمل الأعداد، وكمان بيطلب من الشعب اللبناني إنه يلتزم ويتعاون، ولكن في استثناء من الإغلاق للمطارات وكذا قطاع تاني.
وفي الأردن بدأ الحظر الشامل إمبارح وهيستمر لمدة أربع أيام لغاية يوم الأحد اللي جاي، وده كمان للسيطرة على الأعداد المتزايدة، وفي مصر طبقوا غرامات مالية على اللي مش هيلبس الكمامة في المواصلات، أو المحلات التجارية، أو الأماكن الزحمة عمومًا.
من سنة تقريبًا العالم اتفاجأ بجائحة كورونا اللي عملت شلل في كل المجالات تقريبًا في العالم بسبب الإغلاق اللي حصل في كل البلاد، علشان يمنعوا انتشار العدوى ويحافظوا على الأرواح والسلامة الصحية للشعوب، وبعد ما استمر الإغلاق لشهور وبعد سيطرة البلاد على المرض، رجعوا يفتحوا تاني واحدة واحدة، وبدأت المجالات ترجع تشتغل تاني.. فهل يا ترى الدنيا هترجع تقفل تاني ولا إيه هيكون مصير البلاد من جائحة كورونا؟