قرارات من الحكومة للحد من انتشار فيروس كورونا

بما إن ده موسم الدراسة فرجع الطلاب للمدارس والجامعات بتاعتهم وكمان رجع الناس لشغلهم، ورغم إن ده الطبيعي لإن المفروض ترجع الحياة لنمطها الطبيعي، إلا إن ده تسبب في قلق من تزايد حالات الكورونا ومواجهة موجة ثانية، خصوصًا إن مش الكل بيلتزم بتوصيات وزارة الصحة زيّ لبس الكمامة والتباعد الاجتماعي في فصول المدارس والجامعات.

وبعد اكتشاف بعض الحالات في المدارس والجامعات، صرح المستشار نادر سعد المتحدث باسم مجلس الوزراء باتخاذ الحكومة بعض القرارات لمحاولة السيطرة على انتشار الوباء، ومنها هو قرار غلق فصول المدارس اللي تعددت فيها حالات الكورونا، ولو زادت الحالات في فصول أخرى ستغلق المدرسة بالكامل لمدة 28 يومًا، وكمان هيتم تطبيق غرامة بقيمة 4 آلاف جنيه لأي حد ميلبسش الكمامة في الخارج.

وكمان أكد إن هيبقى في دوريات تفتيشية بشكل مستمر على المقاهي والمنشأت العامة، وإن أي استهانة بالإجراءات الاحترازية هتخلي الحكومة مضطرة تأخد إجراءات صارمة زيّ غلق المقاهي والأماكن الترفيهية من تاني منعًا للتكدس والاختلاط.. مهم جدًا إن كلنا نأخد احتياطاتنا ونهتم بإتباع كل إرشادات وزارة الصحة منعًا لارتفاع نسب الإصابة بالوباء.

آخر كلمة: ماتفوتوش قراءة “مصر توقع 15 اتفاقية ومذكرة تفاهم مع العراق في مختلف المجالات“.

تعليقات
Loading...