كشفت مصادر قضائية وأمنية تفاصيل القبض على رجل الأعمال محمد الأمين في واحدة من فيلاته في القاهرة. وجهت النيابة للأمين تهمة الاتجار بالبشر وممارسة أعمال يعاقب عليها القانون مع مجموعة من البنات اللي عايشين في دار الأيتام اللي أسسها المتهم في محافظة بني سويف خلال الكام شهر اللي فاتوا.
كانت الأجهزة الأمنية وصلها بلاغ إن محمد الأمين، رجل الأعمال، ارتكب جرائم يعاقب عليها القانون مع مجموعة من البنات في دار أيتام “الأيدي الأمينة”، وبعد ما أخدت النيابة الإجراءات وعملت التحريات اللازمة واستمعت لأقوال الضحايا من البنات الأيتام، صدر قرار من الجهات المختصة بالقبض على المتهم وتحرير محضر بالجريمة واتحول للنيابة العامة علشان تكمل التحقيقات.
وبعد عرض المتهم على النيابة العامة قررت، يوم الجمعة بالليل، حبس المتهم 4 أيام على ذمة التحقيق، بتهمة الاتجار في البشر والتعدي الجنسي على الأطفال في دار الأيتام المملوكة له. وطالبت النيابة بعض التحريات من إدارة مكافحة الإتجار بالبشر والهجرة غير الشرعية لكشف تفاصيل الجريمة المتهم فيها محمد الأمين بالإتجار بالبشر.
كمان الأمين متهم في قضية تهرب ضريبي بقيمة 447 مليون جنية في صفقة واحدة بخصوص أسهم في شركة كان شريك فيها.
بعد القبض على المتهم قررت وزيرة التضامن الاجتماعي الدكتورة نيفين القباج إغلاق دار أيتام “الأيدي الأمينة للفتيات بلا مأوى” وإلغاء كل التراخيص ونقل البنات (18) لمؤسسة اجتماعية تانية.
إعترافات ضحايا محمد الأمين
في الأول حكت بعض البنات اليتيمات اللي كان بيحصلهم من المتهم لواحدة ست مصرية، وده اللي أكده رامي الجبالي صاحب صفحة “أطفال مفقودين” على الفيسبوك. قدم الجبالي بلاغات للجهات المختصة، بعد ما حكت له الست دي عن اللي سمعته.
ومن الحاجات اللي حكتها البنات إن الأمين كان بيغريهم بالفلوس والهدايا أحيانًا أو بالتهديد أحيانًا تانية في مقابل إنهم يسمحوا له يتحرش بيهم وينتهك أجسامهم، وحكت واحدة من الأطفال إنه أقنعها إنهم متجوزين عرفي.
وكمان أكدوا في تحريات النيابة إنه كان بيهددهم بالضرب والحبس والإهانة لكل اللي ترفض طلباته.
الأمين لواحدة من ضحاياه: “بتعيطي عشان بلمس جسمك؟”
وقال الجبالي إن واحدة من البنات قالتله: “كان كل ما يحط ايده على جسمي أعيط.. ولما بيسألني انتي بتعيطي عشان بلمس جسمك؟ كنت بخاف وأقوله لا لا أصل ماما وحشتني بس والله .. من الخوف”.
وأضافت البنت اللي عندها سنة “لما لقاني بعيط كثير جابلي ورقة وقالي تعالي امضي وتبقي مراتي.. ولما سألته ايه دي قالي ورقة جواز”.
وكشفت طفلة تانية عمرها أقل من 12 سنة بشوية، إن رجل الأعمال كان بيجمع البنات الصغيرة ويطلب منهم يصلوا، وكان بيقول “اللي مش هتصلي بانتظام هتتحبس تلات أيام”.
وكمان قالت إنه في مرات تانية كان بيجيبها هي وبنات تانية من الأطفال اللي في الدار لأوضته ويطلب منهم يرقصوا، ووضحت إنه كان بينام في الدار 3 أيام في الأسبوع معظم الوقت.
العبودية الجنسية في فيلا الأمين في الساحل الشمالي
كشفت 3 بنات من ضحايا المتهم إنهم اتنقلوا من دار أيتام “الأيدي الأمينة” المملوك لمحمد الأمين في بني سويف لدار تانية في الجيزة، ومن هناك اتنقلوا لفيلا في الساحل الشمالي يمتلكها الأمين، وهناك طلب من كل واحدة منهم تقلع هدومها وتلبس هدوم جديدة، منها ملابس نوم لإغراض جنسية وبكيني. وبعدين طلب منهم الإقامة معاه في الفيلا بتاعته دي. وطول فترة بقاء البنات في فيلا الساحل الشمالي كان المتهم بيتهك عرضهم بشكل دائم.
وقالت واحدة من البنات إنه كان بيروح لهم ويقعد معاهم 3 أيام في الأسبوع، وكان بيشتري لهم سماعات ويشغل مزيكا، ويطلب منهم يرقصوا له بحجة إنه بيعمل كده علشان يخليهم يخسوا.
بعد الأحداث دي بدأت البنات تحكي اللي بيحصل معاهم لواحدة من المشرفات في الدار واللي حكت لمحمد الجبالي، ومن هنا وصل الموضوع للنيابة وبدأت التحقيقات.
من هو رجل الأعمال محمد الأمين؟
محمد الأمين هو رجل أعمال مصري اشتغل في الكويت في بداية حياته وبعدين رجع مصر وبدأ يشتغل في السيراميك. بعد ثورة 25 يناير 2011، ظهر محمد الأمين على ساحة رجال الأعمال بقوة في مصر، وعرفناه بإنه مؤسس مجموعة قنوات سي بي سي، وشبكة في قنوات مودرن، بالإضافة لتأسيس وكالة الأخبار العربية AUA، وقناة النهار، وكمان كان شريك في مجموعة شركات عامر جروب.