من أول ما بيبدأ الإعلان عن مسلسلات رمضان كل سنة، الناس بتبدأ تشوف الكلام هيبقى على إيه، ومين هيعمل إيه ومين مش هيكون موجود على الشاشة، ومين اللي هيمثلوا قدام بعض لأول مرة. والسنة دي شوفنا دويتوهات جديدة هتقدم أدوار البطولة مع بعضها للمرة الأولى في دراما رمضان.
أمينة خليل وأمير كرارة
مثلوا قبل كده في مسلسل “طرف ثالث” سنة ٢٠١٢، بس ماكانش فيه مشهد يجمعهم، بس السنة دي متحمسين نشوفهم مع بعض، خصوصًا إن السنة اللي فاتت أمينة خليل سابت بصمة مميزة في عمل استثنائي ناقش قضية ماتكلموش عنها قبل كده في الدراما في مسلسل “خلي بالك من زيزي”، وبدايتها الحقيقية في الدراما كانت لما عملت دور نازلي في “جراند أوتيل” وبعدها كريمان في “ليالي أوجيني”. وعلى نفس المستوى من الأعمال الناجحة في الدراما، عمل أمير كرارة أدوار في “كلبش” و”الاختيار” خلت الجمهور يطلق عليه لقب “باشا مصر”.
وفي مسلسل “العائدون” هنشوف معاهم قصة من ملف المخابرات المصرية، أبطالها الحقيقين لسه عايشين معانا. والقصة من تأليف باهر دويدار اللي نفى إن يكون للمسلسل صلة بمسلسل “هجمة مرتدة”، وقال إن قصته عن الأشخاص اللي رجعوا من مناطق وأوكار الإرهاب. والمسلسل تم تصويره في دول كتير غير مصر وبيشارك أمير وأمينة في البطولة محمود عبد المغني ومحمد فراج وجيهان خليل وإسلام جمال ومحمد عز.. متحمسين للمسلسل!
عمرو سعد وصبا مبارك
صبا مبارك اشتهرت في مصر بدورها في مسلسل “حكايات بنات”، وواحد من الأدوار المميزة هو ودورها في مسلسل “طايع” ومسلسل “موجة حارة”. بس لأول مرة السنة دي، هتمثل دور بنت شعبية بتأدي البطولة قدام عمرو سعد، واللي معروف عنه دايمًا تميزه في دور الشاب ابن البلد الجدع، زيّ مسلسل “ملوك الجدعنة” و”شارع عبد العزيز” و”خرم إبرة” و”بركة” و”يونس ولد فضة”.
دينا الشربيني ومحمد رمضان
السنة دي هنشوفهم مع بعض في عمل درامي بيجمعهم لأول مرة، ماهر، اللي هيبقى متورط في تجارة الآثار وهيعيش رحلة من الهروب من مراته، اللي بتلعب دورها دينا الشربيني.
على مدار السنين اللي فاتت، دينا موهبتها بدأت تلمع بالتدريج، والمنتجين بقوا يسندوا لها الأدوار بكل ثقة، ودورها في مسلسل “زيّ الشمس” سنة ٢٠١٩ أظهرها بشكل تاني مختلف ومميز، وأثبتت فعلًا إنها ممثلة من العيار الثقيل.
أما عن محمد رمضان، فمعروف عنه إنه بيبقى التريند في أي عمل بيعمله، وبغض النظر عن الانتقادات اللي بيتعرض لها بسبب تكرار نفس الشخصيات، بس هو موهبة نشهد لها.
نيللي كريم وشريف سلامة
أول ما شوفنا تتر مسلسل “فاتن أمن حربي”، قولنا هنشوف جرعة من النكد اللي معودانا عليه نيللي كريم في كل مسلسلاتها، واتحمسنا أكتر لما عرفنا إن اللي هيمثل دور جوزها هو شريف سلامة. ولما ظهر شريف في التتر وهو بيقول “أنا عايزك تقولي حاضر ونعم وبس”، اتأكدنا إن الست دي هيبقى واقع عليها ظلم كبير وهنعيط معاها كتير كالعادة.
نيللي كريم مافيش خلاف على موهبتها، وشريف سلامة موهبة مميزة بس مش واخدة حقها، وده اللي اتقال على لسان محمد العدل لما علق على أداء شريف في المسلسل وقال إنه هيبقى مفاجأة رمضان السنة دي.
فيفي عبده وشرين رضا
فوفا وشيكا كل واحدة لها لونها وأدائها في التمثيل، مين ينسى الست أصيلة في مسلسل “الحقيقة والسراب”، ونجوى كامل في “بدون ذكر أسماء”؟ متوقعين ثنائي دمه خفيف وروحه حلوة.
قولوا لنا إيه أكتر ثنائي متحمسين له السنة دي في مسلسلات رمضان؟
آخر كلمة: ماتفوتوش قراءة: مسلسلات رمضان 2022: 10 مسلسلات تشوفها على Sling