محمد دياب يكشف 8 مفاجئات عن الفريق المصري اللي اشتغل على Moon Knight

مسلسل مارفل الجديد “Moon Knight” هينزل يوم 31 مارس على قناة ديزني بلاس، والعالم كله منتظر المسلسل بفارغ الصبر، بس الوطن العربي والمصريين بالذات مستنيين المسلسل لأسباب أكتر من باقي العالم، ومختلفة عنه.

واحد من أهم أسباب انتظار العرب والمصريين للمسلسل هو إن في فريق مصري كامل بيشتغل على المسلسل، من إخراج وتأليف ومونتاج ومزيكا وديكور وتمثيل كمان.

في آخر لقاء صحفي مع المخرج المصري محمد دياب، مخرج مسلسل “Moon Knight”، كشف لجريدة في الفن عن مجموعة من المفاجئات بخصوص الفريق المصري اللي بيشتغل معه على المسلسل، وعندنا شوية معلومات زيادة لازم تعرفهم عن الفريق المصري اللي بيشتغل عليه. يلا نشوف المفاجئات!

محمد دياب: مخرج عالمي

عن: gemini

فيلم “الجزيرة” اللي من إخراج شريف عرفة وسيناريو محمد دياب كان بيمثل مصر في جوايز الأوسكار عن فئة “أفضل فيلم أجنبي”، أما فيلم “678” من إخراج دياب، فأخد جوايز مهمة من مهرجانات عالمية كتير، من أول الإمارات لحد الولايات المتحدة الأمريكية.

وفيلم “اشتباك” اللي برضه من إخراج وتأليف دياب، فقال النجم الأمريكي توم هانكس، اللي شاف الفيلم في مهرجان كان السينمائي: “لو جات لك الفرصة، لازم تشوف فيلم “اشتباك” للمصري محمد دياب، الفيلم هيكسر قلبك ويعلمك كتير”، أما فيلم دياب الأخير “أميرة” فأخد جايزتين مهمين هما جايزة “لانتيرنا ماجيكا” و”انترفيلم” من مهرجان فينيسيا السينمائي.

محمد دياب رفض يخرج فيلم لتوم هانكس

توم هانكس عرض على دياب إخراج فيلم “Greyhound”، اللي كان من بطولة هانكس وتأليفه وإنتاجه، بس دياب رفض الفكرة لإنه ماقدرش يرتبط بالفيلم وماحركش مشاعره خالص، وأكد إن قرار الرفض ده كان صعب جدًا عليه.

سيناريو المسلسل من تأليف محمد دياب وزوجته سارة جوهر

على اليمين سارة جوهر، عن: facebook

وضح دياب إن “مارفل” أديته الفرصة إنه يخلي عالم المسلسل سوداوي أكتر، وكان عنده مساحة كبيرة إنه يبين شخصيته في العمل الفني، وإنه يكتب نسخة من السيناريو مع زوجته المؤلفة والمخرجة، سارة جوهر.

وأضاف دياب إن زوجته بتشتغل معاه في كل مشاريعه الفنية، وإنهم كتبوا نسخة من سيناريو المسلسل ظهرت فيها شخصياتهم، وخلوا الدراما أقوى بكتير، والعالم مظلم أكتر، وحتى بصريات المسلسل بقت أغمق.

هشام نزيه ألف موسيقى المسلسل بالكامل

صرح دياب إن الموسيقار المصري، هشام نزيه، هو اللي ألف الموسيقى التصويرية للمسلسل كله، وأكد إن موهبة نزيه الفذة هتكون سبب في إنه يشتغل في هوليود كتير جدًا الفترة اللي جاية.

في ممثلين مصريين كتير في المسلسل

محمد دياب
عن: filfan

أكد دياب إن مسلسل “Moon Knight” هيشارك فيه ممثلين مصريين كتير، زيّ  أحمد داش وحازم إيهاب وعمرو القاضي وزيزي داغر وسارة القلماوي اللي هتعمل دور كبير، وقال إنه كان مُصر طول الوقت إن أي شخصية مصرية يعملها ممثل مصري؛ لإنه شايف إن كل ثقافة لازم يمثلها أصحابها.

أحمد حافظ عمل مونتاج حلقتين من Moon Knight

اشتغل أحمد حافظ على فيلمين مع محمد دياب، هما فيلم “اشتباك” وفيلم “أميرة”، وكان في تقدير دولي لحافظ عن مونتاج فيلم “اشتباك”، ووصفته الناقدة الأميركية، ديبورا يانغ، في مجلة هوليود ريبورتر بإنه “مونتاج سريع وسلس زي ضرب النار”. وأخد حافظ عن الفيلم 3 جوائز من مهرجان أيام قرطاج السينمائية وجمعية الفيلم والمهرجان القومي للسينما المصرية.

وأشتغل حافظ على مونتاج حلقتين من مسلسل “Moon Knight” هما الحلقة التالتة والرابعة، واحدة من إخراج دياب والتانية من إخراج الثنائي جاستن بنسون وآرون مورهيد.

فريق المصريين اللي اشتغلوا على المسلسل أبهروا مارفل

 قال دياب: “المصريين اللي اشتغلوا معاهم في Moon Knight، سواء في التمثيل أو تصميم الأزياء أو الموسيقى أو المونتاج أو الإشراف الفني، أبهروا “مارفل” كلها، والشركة عايزة تشتغل معاهم تاني”.

وكمان أكد إن مصممة الأزياء الأمريكية، ميجان كاسبيرليك، كانت سعيدة جدًا بمصممة الأزياء المصرية، ريم العدل، اللي اشتغلت على الأزياء المصرية في المسلسل، وكمان كان فريق مهندسين الديكور الأمريكاني مرحب جدًا بالمهندس المصري، علي حسام.

جزء كبير من أحداث المسلسل بيحصل في مصر

أكد محمد دياب إن جزء كبير من أحداث المسلسل بيحصل في مصر وشوارعها، وقال بخصوص الموضوع ده إنه وضح لمارفل إن: “مصر لازم تطلع مصر”، وكان عايز يصور كل مشاهد مصر في البلد، لكن للأسف تصاريح الـتصوير اتأخرت في مصر، وعلشان كده اضطروا يصوروا مشاهد مصر كلها في المجر في بودابيست، وعملوا ديكورات كاملة لشوارع مصر هناك. تقدر تقرا كل تفاصيل الموضوع من هنا.

لما تشوف المسلسل قول لنا رأيك في الكومنتات، لو عجبك! عجبك ليه؟ وإيه أكتر حاجة عجبتك في المسلسل؟ ولو ماعجبكش، قول لنا ماعجبكش ليه، وكان ممكن تغير فيه إيه؟

آخر حاجة: ماتفوتوش قراءة: أول مخرج مصري في عالم الأبطال الخارقين.. اختيار محمد دياب لمسلسل مارفل الجديد

تعليقات
Loading...