في اليوم العالمي للسفر لوحدك، وبما إني شخص بيحب يسافر لوحده كتير، وبيعرف ينبسط، هدي لك شوية نصايح ممكن تساعدك تستكشف عالم السفر لوحدك، وتعرف تستمتع بوقتك، حتى لو كنت واحد من الناس اللي مش بتعرف تسافر غير مع مجموعة، ومش بتنبسط لوحدك.
بس قبل ما ندخل في النصايح، عايز أقول إني ماعنديش مشكلة في السفر مع مجموعة صحاب، أو حتى مجموعة ناس مش قريبين مني أوي، وبنبسط جدًا، ولكن بالنسبة لي السفر لوحدي تجربة استرخائية مميزة بتساعدني آخد أجازة من الشغل ومن زحمة المدينة وملل الروتين.
وبيساعدني أفصل من الضغوط الاجتماعية، وبما إني شخص عنده درجة من القلق والرهاب الاجتماعي، بيساعدني أعيد شحن طاقتي الاجتماعية وأرجع شخص نشيط وسعيد وعنده قدرة أكبر على التفاعل مع الناس اللي بحبهم واللي بشتغل معاهم، واللي بشوفهم في الشارع.
وكمان بيبقى عندي سعة صدر حتى مع الناس اللي بسوق جنبهم على الدائري، ومش ببقى عايز أدوس عليهم كلهم بالعربية. حقيقي السفر لوحدك بيعمل معجزات!
يلا نشوف النصايح!
خليك إيجابي واتقبل فكرة إنك مسافر لوحدك
أغلب الناس عندها خوف كبير من السفر لوحدها، وبيبقوا فاكرين إنه مش أمان، بس ده مش حقيقي خالص، عناصر الخطر في السفر هي هي، سواء كنت لوحدك أو معاك مجموعة، غير إن السفر لوحدك بيديك حرية أكبر.
غير إن هيبقى عندك مساحة كبيرة إنك تتعرف على ناس جديدة، علشان عندك طاقة أكبر على التواصل الاجتماعي كان ممكن تخلصها كلها في الخناق مع صحابك على هتروحوا فين وهتعملوا إيه.
احجز تذكرة الطيران قبل السفر بكام شهر وخد راحتك
من أغلى الحاجات اللي بنصرف عليها فلوس في السفر هي تذاكر الطيران، ولكن لما تحجز التذكرة قبل السفر بكذا شهر وتخطط سفريتك على حسب رحلة الطيران الأرخص، هتصرف فلوس أقل بكتير.
وعلشان مسافر لوحدك، هتلاقي الموضوع سهل إنك تحجز تذكرة طيران في الوقت اللي أنت عايزه واللي يناسبك بأقل سعر ممكن، لإن مافيش حد مسافر معاك تعمل حسابه في التوقيت والحجز، دي أول خطوة في سفرية سعيدة لوحدك.
جهز لرحلة الطيران
مهما كانت رحلة الطيران طويلة أو قصيرة، بنبقى محتاجين ونس علشان مانزهقش في الطريق أو في انتظار المطار، وعلشان كده ممكن نجهز كتاب نقراه، أو نحمل مسلسل أو فيلم على نيتفليكس التليفون ونتفرج عليه في الطريق، ده هيوفرلنا الونس اللي محتاجينه في السفر.
دور على الرحلات والجولات الجامدة واللي تستاهل فلوسك في السفرية
من أكتر الحاجات اللي بتضايقني في السفر مع مجموعة هي الاختلاف، هنروح فين وهنعمل إيه، والاختلافات دي غالبًا بتوصل لخناقات وبتضيع وقت طويل من عمر السفرية.
علشان كده، السفر لوحدك بيوفر وقت وبيريح دماغك من الحوارات دي، اللي عايز تعمله اعمله وقت ما أنت عايز، وعلشان الحرية دي لها تمن، وهو إنك ممكن تاخد قرارات فردية وحشة، من الأفضل إنك تعمل بحث كويس عن الجولات والأنشطة الموجودة في المكان اللي أنت فيه، وتقرر إيه أحسن نشاط ممكن تعمله ويستاهل فلوسك.
قل لنا رايح فين
اعمل جدول بتحركاتك خلال السفرية، وابعت نسخة منها لحد من معارفك اللي بتثق فيهم، وقبل ما تروح أي مكان خلال السفرية ابعت تفاصيل الرحلة دي لحد قريب منك، عرفهم هتروح فين وامتى وهترجع امتى، بالذات لو المكان اللي رايحه ده من الصعب إنك تتواصل فيه مع حد، أو مافهوش شبكة تليفون.
علشان ممكن تحصل حاجة وتلاقي نفسك ضايع أو محبوس في مكان ومحتاج مساعدة، ساعتها الشخص اللي عارف أنت فين يبلغ ويطلب مساعدة لك.
وحاول ماتروحش لوحدك مكان بالليل، ولو خلاص حبكت إنك تروح لوحدك بالليل أي حتة، فلازم تشارك حد من صحابك كل التفاصيل، موقع المكان ده والوقت اللي هتقضيه هناك وهترجع امتى.
اعمل قائمة طوارئ
اعمل قائمة بأرقام التليفونات اللي ممكن تحتاج تكلمها في حالات الطوارئ، وخلي القائمة دي على تليفونك في خانة الطوارئ، وكمان اعمل منها نسخة مكتوبة وخليها في شنطتك أو في جيبك طول الوقت.
غير الأرقام في معلومات كتير مهمة، زيّ عناوين أقسام الشرطة وأرقام الإسعاف في المكان اللي أنت فيه، وعنوان الفندق أو البيت اللي أنت مقيم فيه.
اتعرف على ناس جديدة وانبسط
كونك لوحدك بيديك مساحة أكبر إنك تقابل ناس جديدة وتتعرف على شخصيات مختلفة عن صحابك اللي متعود تسافر معاهم، ولإن دي واحدة من أهم إيجابيات السفر لوحدك، حاول تستغلها على قد ما تقدر.
اعمل خطوات صغيرة كل يوم علشان تتعرف على ناس جديدة في سفريتك، بالذات لو كنت في بلد جديدة وعندك فرصة تقابل ناس من جنسيات مختلفة، هيزيدوا ثروتك الثقافية ويخلوك تفهم أكتر عن العالم خارج حدود دايرتك.
علشان تقدر تتعرف على ناس جديدة، خليك لطيف طول الوقت مع كل الناس، وساعد الناس في طريقك، وابدأ بالكلام، بمجرد كلمة أو سؤال بسيط، وغالبًا هتلاقي الناس ودودة جدًا وعايزة تتعرف وتتكلم.
أخيرًا: مش معنى كلامنا إنك تقطع علاقتك بكل صحابك اللي بيسافروا معاك، وتقرر إنك هتبقى إنسان وحيد شريد سارح في الملكوت لوحدك على طول، ولكن قصدنا إنك تجرب السفر لوحدك من وقت للتاني وتعرف تستمتع بإيجابياته.