منصة “نتلفكس” أعلنت عن أحدث أعمالها العربية، “دبي Bling” بدأ عرضه من يوم 27 أكتوبر، ومن يوم العرض ناس كتير اتكلمت عن المسلسل، دبي Bling بيجسد حياة 10 أشخاص بيعيشوا حياة رفاهية في مدينة دبي، والمشاهدين من خلال المسلسل اللي بيتصنف ضمن أعمال تليفزيون الواقع، بيتجولوا بين عالم الثراء والشهرة مع الأبطال، اللي بنشوف حياتهم اليومية في المسلسل بعد ما وصلوا لقمة النجاح في مجالات مختلفة.
الأشخاص اللي شوفناهم في المسلسل وصلوا لحياة الرفاهية والنجاح دي في مجالاتهم، اللي تنوعت بين العقارات والإعلام والحضور المجتمعي والمؤثرين على مواقع التواصل الاجتماعي أو “الإنفلونسرز”، كل شخص فيهم حقق نجاح عظيم في حياته وشغله، والوقت اللي بنشوفهم فيه دلوقتي بيكونوا عايشين اليوم اللي كانوا بيحلموا به طول حياتهم.
الرأسمالية في أبهى صورها
آراء الناس في المسلسل بعد أيام قليلة من عرضه كانت متباينة، في رأي شايف إن المسلسل بيجسد حياة الرأسمالية والاستهلاكية في أبهى وأحدث صورها، وإن اللي بنشوفه في المسلسل ثراء فاحش يندرج تحت بند “استفزاز” لمشاعر أغلب الناس اللي عايشين في الوطن العربي خصوصًا، في ظل الظروف الاقتصادية الصعبة اللي بنعيشها دلوقتي، نشوف ناس بتتناقش في مليارات الدولارات، وأفقر حد فيهم اتعمله فرح أسطوري بملايين.
الناس أصحاب وجهة النظر دي شافوا كمان إن اللي شافوه في المسلسل بعيد عن أرض الواقع، وبعيد عن الهوية العربية اللي مفروض المسلسل بيحمل رايتها، كونه مسلسل عربي على منصة نتفلكس العالمية.
كان الأولى نناقش حياة الناس “العاديين” لإن مش كلنا في الوطن العربي بنتكلم بالملايين والمليارات، الحياة اليومية الواقعية للشعوب العربية فيها كتير، مش هنقول كان أولى نظهر المشاكل اللي بنواجهها، لكن حتى الإيجابيات فيها كتير جدًا قريب من الواقع، بحيث اللي يشوف المسلسل ياخد فكرة حقيقية عن الشعوب العربية، مش فكرة بتعبر عن 1% من سكان الوطن العربي.
نجاح مستحق
على العكس، في مشاهدين شايفين وجهة نظر مختلفة، احنا دلوقتي بنشوف في المسلسل وصول الأشخاص دول لقمة النجاح، بعد مشوار من الجهد علشان يحققوا حلمهم، والمسلسل بيركز على قمة النجاح وحياتهم الحالية، لكن النجاح ده يستحقوه، حتى لو حياتهم بيعيشوها برفاهية كاملة ويعتبروا نسبة قليلة من المجتمع.
كمان الأشخاص دول يعتبروا قدوة للشباب اللي عايزين يبدأوا حياتهم العملية، وشايفين إن الطريق مليان بالمخاطر والصعوبات، لما الشباب دول يشوفوا قدامهم نموذج حقيقي لأشخاص كانوا في مكانهم في يوم من الأيام وحققوا أحلامهم ووصلوا لقمة النجاح، هيتشجعوا يبدأوا طريقهم وحلمهم علشان حاسين إن تحقيق الحلم مش مستحيل، وشايفين نماذج واقعية لده قدام عينيهم.
زي “كريس” اللي بيحكي في المسلسل لقطة من زمان، وقتها جيه دبي ومعاه 300 دولار، وبدأ بهم مشروعه لحد ما بقى مليونير، وجه نفس المطار تاني لكن بطيارته الخاصة، ده ممكن يكون موقف بسيط لكن يخلّي الشباب عندها أمل إنها ممكن في يوم من الأيام توصل لقمة النجاح في حلمها.
في ناس كمان عبرت عن حبها للإعلامية “لجين عمران” ورحلة كفاحها.
الاستثمار في دبي
من إيجابيات دبي bling إنه ركز على دبي كوجهة مثالية للاستثمار في الوطن العربي، تحقيق أحلام عدد كبير من رجال الأعمال في دبي يستحق الذكر، وتركيز الاهتمام على مجال الاقتصاد اللي بتأثر فيه دبي بشكل رئيسي.
ده هيجذب عدد أكبر من الاستثمارات لدبي، ويعتبر أحسن وأكبر تسويق لدبي، بشكل أحسن من الإعلانات اللي ممكن نفضل نعمل فيها سنين وماتوصلش للناس، لكن تليفزيون الواقع أو المسلسلات، وخصوصًا على منصة عالمية زي نتفلكس، بتوصل للناس بشكل أفضل بكتير، غير لما تكون بتدي للمتفرج مادة إعلانية، هو بيتفرج على مسلسل بيوصل له المعلومة بصورة كاملة.
