حصن تاريخي على صخرة عملاقة بشكل يجمع الطبيعة والتاريخ.. قرية حيد الجزيل في اليمن من الأماكن المختلفة اللي تستحق التجربة، ولازم تكون ضمن خطتك لو بتفكر تزور اليمن، اسم “حيد الجزيل” بيعني “الجبل العظيم”.. والصور هتوضحلك قد إيه المكان فعلًا يستحق السفر.
المراجع التاريخية بتقول إنها عمرها ٥٠٠ سنة، لكن روايات السكان بتقول إنها حوالي ٧٠٠ سنة.. القرية موجودة على صخرة بتحيط بيها واحة زراعية، وبترتفع عن الوادي بحوالي ٣٠٠ متر، وعلشان توصل لها هتصعد على سلالم حجرية منحوتة في الصخر.. علشان كده الوصول ليها تجربة مميزة.
البيوت في حيد الجزيل تم بنائها على حافة الصخرة، واتبنت بالطوب اللبن والأرضيات الخشب، وبيتم إصلاحها وصيانتها باستمرار خصوصاً بعد الأمطار الصيفية.. والقرية موجودة في وادي دعن، واحد من أودية غرب حضرموت، اللي بيعتبر أشهر الأماكن السياحية في اليمن، لإنه بيقع بين الجبال والهضاب العالية.
القرية تعتبر شاهد تاريخي وحصن من حصون اليمن، اللي اتعودوا أهلها على بناء بيوتهم في مرتفعات صخرية عالية من زمان، علشان يحصنوا نفسهم ضد هجمات الغزو المتكرر، وتعتبر حيد الجزيل شاهد تاريخي حضر كتير من الأحداث التاريخية في اليمن.
جريدة ديلي ميل البريطانية نشرت مقال بيتكلم عن جمال القرية الفريدة من نوعها، اللي بتطفو على صخرة ضخمة ارتفاعها 350 قدم مع جانبين عموديين في وادي دوعن، وكإنها من كوكب تاني.