سقطرى: جزيرة النعيم في اليمن بطبيعة فريدة عن العالم

بطبيعة خاصة تحسسك إنك برا العالم وفي كوكب تاني، أو إنك في خيال يشبه الأفلام، سقطرى أو “جزيرة النعيم” مش مجرد تعبير إنشائي عنها، لكن ده ترجم اسمها بالفعل في اللغة الهندية، وهي فعلًا اسم على مسمى، ورغم الصعوبة اللي ممكن تقابلها في رحلة السفر ليها اللي بتستغرق حوالي 14 ساعة سفر من مدينة عدن، لكن بمجرد وصولك هتحس إن كل التعب ده يستاهل الوصول ليها.

سقطرى اليمنية بتتكون من أرخبيل بيضم 6 جزر على المحيط الهندي بالقرب من خليج عدن، وعلى بعد 380 كيلومتر من شبه جزيرة العرب، وتعتبر أكبر الجزر العربية. الأرخبيل ده من أهم المحميات الطبيعية العالمية، وده للتنوع الحيوي الفريد والأهمية البيئية للجزيرة وانعكاسها على العالم، وعلشان كده، اليونسكو أدرجتها ضمن قائمة التراث الإنساني العالمي.

سقطرى قدرت تنجو من الصراعات السياسية اللي في اليمن، وانتعشت اقتصاديًا بسبب السياحة، لإنها بيتوافد عليها سياح من مختلف الجنسيات، كمان لإنها دلوقتي بتتمتع بمشاريع البنية التحتية اللي ليها دور كبير في إنعاش الجزيرة بعد سنين من إهمالها، كمان إنشاء وتمهيد الطرق، وبناء الفنادق وأماكن الإقامة، وبتتمتع بأجواء هادية بعيدًا عن أي ظروف بتتعرضلها محافظات كتير في اليمن.

عن: Elaph

آخر كلمة: ماتفوتوش قراءة: على عكس حال باقي البلد: مدينة البترون السياحية اللي قدرت تنجو من أزمات لبنان

تعليقات
Loading...