كلنا بنحب نسمع حواديت من وإحنا صغيرين، ولحد دلوقتي حتى لما كبرنا لسه بنحب نسمع حكايات خصوصًا قبل النوم، بس مابقاش فيه زيّ زمان برامج كتير على الراديو أو التليفزيون، لكن مع التطبيقات دلوقتي واختلافها، بقى متاح لينا دلوقتي الحكايات المختلفة على تطبيق أنغامي بكذا بودكاست، كمان بيتميزوا بإن الحواديت للكبار وللأطفال.
Storytime With Teta
ودي من أشهر البودكاستس الخاصة بحواديت الأطفال، وبتتكون من تيتا أو الجدة أمل اللي بتلم أحفادها حواليها وتحكيلهم حواديت وقصص باللغة العربية، واللي بيميز البودكاست ده هو الأداء التمثيلي للي بيحكي القصة، وده بيساعد اللي بيسمع الحدوتة إنه يندمج أكتر في التخيل ورسم أحداث الحدوتة في قصة مصورة في خياله.
قبل النوم
وده رد على جملة “احكيلي حدوتة قبل ما انام” اللي بتسمعها من ولادك أو اخواتك الصغيرين أو أطفال العيلة اللي بيعتبروك راوي، بودكاست بيقدم حواديت للأطفال بشكل متنوع وقصص بسيطة ليها معنى ومغزى في نهايتها يستفيد بيها الطفل.
ألف ليلة وليلة
قصص قصيرة للأطفال
ودي بتحتوي على قصص اتعودنا عليها من صغرنا، حواديت الحيوانات في المزرعة والغابة والحياة بينهم، الهدف منها بيكون تعليم الأطفال أخلاق كويسة بأسلوب سهل ولطيف يشد الأطفال.
حكايات لامعة
بجملة “القصة خير من ألف نصيحة” بيقدم البودكاست حكايات وقصص ملهمة للأطفال بطريقة تناسبهم، منها قصص عن ذوي الاحتياجات الخاصة وقصص ليها أبعاد فلسفية وأخلاقية لكن طريقة تقديمها معمولة بحرفية بحيث تكون مناسبة لسن الأطفال وفهمهم.