العلماء العرب مشهورين في العالم، تاريخنا القديم في الرياضيات والطب وكل العلوم تقريبًا، وكمان تاريخنا الحديث، بس الحكاية بتختلف شوية لما نتكلم عن الأدب العربي، يعني بعد نجيب محفوظ محتاجين ننشر الأدب العربي في العالم الغربي، وده اللي بتحاول الإمارات تغيره.
اللغة ليها عامل كبير في اللي حصل للأدب العربي عالميًا، زمان كان العربي من اللغات المهمة للتجارة العالمية، وكان الأدب العربي بينتشر معاها، زيّ حكايات ألف ليلة وليلة، بس دلوقتي بقى العربي محصور جوا دول الشرق الأوسط بس، علشان كده الإمارات عندها خطة للتعاون مع ويكيبيديا لنشر الأدب العربي.
اعرف أكتر عن: جوجل تفتح التقديم لتطبيق دعم الشركات الناشئة في الشرق الأوسط وشمال أفريقيا
المؤسسة الإماراتية للأدب دلوقتي شغالة بدعم من الحكومة على مشروع مع جوجل، هدفه تسليط الضوء على المؤلفين العرب، وأعمالنا الأدبية العربية، اللي مخدتش حظ كويس في الانتشار للعالم الغربي.
الفكرة قايمة على استعمال الوسائل التكنولوجية الجديدة، وتغيير وضع العربي عن طريقها، والمبادرة اسمها “كتاب مكتوب”، وعندهم خطة مدتها سنين، علشان يضاعفوا فيها عدد الصفحات على موقع ويكيبيديا اللي بتتكلم عن الأدباء العرب، خصوصًا إن عدد الصفحات الحالي أقل بكتير من الموجود على نفس الموقع عن الأدب الأوروبي.
اقرا كمان: مؤشرات البحث السنوية لجوجل.. كورونا مكتسحة وانستجرام في اللالا لاند
عدد صفحات ويكيبيديا الموجودة دلوقتي للأدب العربي هي 1500 صفحة بس، وفي خلال سنتين هيبقوا 15 ألف، عن طريق متطوعين هيشتغلوا على كتابة مقالات عن الأدباء العرب لموسوعة ويكيبيديا، وكمان المؤسسة هتسهل للمؤلفين تسجيل نفسهم على الموسوعة، علشان تساهم في إظهارهم بشكل أحسن في نتايج البحث.
المبادرة موقفتش لحد هنا، في 15 ألف كتاب عربي إلكتروني هيطلعوا للنور في مبادرة تانية موازية عاملاها الجامعة الأمريكية في أبو ظبي، وخلالها كمان جوجل هتساهم في إن المؤلفين العرب المعاصرين يبقوا مسيطرين على تواجدهم الإلكتروني، وجوجل هتسخرلهم خواص جديدة زيّ Google Cameo، علشان يوصلوا صورتهم بالشكل اللي يحبوه للعالم.
اقرأ كمان: جوجل تدعم التحول الرقمي في مصر ببرنامج تجريبي بـ 9 مليون دولار.
كل المشاريع الجديدة دي تم الإعلان عنها في اليوم العالمي للغة العربية، اللي بيكون كل 18 ديسمبر، عشان نحتفل بـ 290 مليون شخص حوالين العالم بيتكلموا عربي.