السوشيال ميديا بقى لها قوة وصوت مسموع. قادرة إنها تفضح وتجيب حقوق وزيّ ما ليها عيوب كمان ليها مميزات. وهاشتاج #حق_آلاء_رمضان_لازم_يرجع محاولة علشان يرجعوا حق بنت اتقتلت غدر ومش عارفين يجيبوا حقها! محاولة للحفاظ على حق لو ماتخدش هنشوف كل يوم حوادث كتير زيّها بتحصل. وماحدش هيسمع عنها حاجة وهتنتهي بموت الضحية!
إيه اللي حصل مع آلاء؟
آلاء رمضان ضحية جديدة من ضحايا العنف الأسري اللي بيحصل يوميًا في بيوت مقفول عليها بابها وماخفى كان أعظم! آلاء اتصلت علشان تستغيث بأهلها وتقول لهم “الحقوني.. هيموتني”! وقبل ما أهلها يوصلوا لها. أهل جوزها كانوا خدوها على المستشفى وهي جثة. بتشخيص كسر في الجمجمة وآثار لخنق على الرقبة وفتح لجرح القيصري
لإنها كانت لسه والدة بنتها من 10 أيام!
شهود العيان بيقولوا إن الضحية اتعرضت للضرب بالشومة والخنق على إيد جوزها وكمان رماها من البلكونة! بس طبعًا أهل جوزها بيقولو عكس كده. وكلامهم بيتغير من إنها وقعت على السلم أو هي اللي رمت نفسها علشان كانت بتعاني من الاكتئاب! يعني واحدة لو كانت ناوية تنتحر وتنهي حياتها كانت هتستغيث بأهلها وتقول لهم الحقوني!
وفي شهادة لزوجة أخو جوز آلاء قالت إنها قررت تكتب علشان اللي شافته من تدليس للحقائق. وإنها حصل معاها نفس اللي حصل مع الضحية وقالوا برضه إنها وقعت من على السلم. ونشرت التقارير اللي بتأكد ده! و قال إنها كانت عايشة وسط عيلة كلها كره وحقد وماعندهمش ميزان للحلال والحرام من أكبر واحد لأصغر واحد. وحكت عن المعاناة اللي كانت بتشوفها وسطهم وإزاي اتخلصت منهم بعد ما اتنازلت عن كل حاجة!
الجاني هنا مش بس جوز آلاء. لأ دي العيلة كلها من الأب والأم اللي ربوا أولادهم على استباحة أذى الناس. العيلة اللي بتحميهم وبتدافع عنهم في الغلط. علشان يزيدوا جبروت وأذى! اللي ماعلمش أولاده يعني إيه تحافظ على أمانة اتعهدت إنك تحميها!
المفروض كل الناس تكتب عن آلاء وعن غيرها من ضحايا العنف الأسري وأيًا كان مين اللي عمل كده. أهلها من حقهم يعرفوا بنتهم ماتت إزاي وتاخد حقها!