صحينا الصبح على أخبار لحريق ضخم حصل في محيط مسجد الحسين، واحد من أعرق وأهم المساجد في القاهرة. الصحف تداولت الخبر وقالت إن الحريق حصل بالتحديد في شارع الأزهر وكان بسبب كابل كهربائي في عقار 3. وامتد للدور التاني ووصل للعقار رقم 4 و5. واللي ساعد إن الحريق ينتشر بشكل أسرع هو طبيعة المكان لإن فيه أسقف خشبية ومخازن وبضائع. كلها تبع المنطقة دي وتبع حي الجمالية. والإصابات وصلت لـ12 حالة اختناق ووصلوا لمستشفى حسين الجامعي.
وفي وقتها انتقلت قوات الحماية المدنية والأجهزة التنفيذية في المحافظة وقدروا إنهم يسيطروا على الحريق. وإزالة الأثار هتتم بعدما تنتهي النيابة العامة والبحث الجنائي من معاينة مكان الحادثة، علشان يحددوا سبب الحريق وإذا كان في شبه جنائية.
وبعدها مباشرة نشر وزير الأوقاف مختار جمعة على الفيس بوك. وقال: محبى آل البيت وكل أهل مصر نؤكد إن الحريق الذى نشب بجوار مسجد الإمام الحسين رضى الله عنه. لم يصب المسجد بأى ضرر والحمد لله، ونتمنى للجميع السلامة”.
ليه مسجد الحسين مش مجرد مسجد؟
اللي خلى الخبر ينتشر بسرعة البرق هو الأهمية التاريخية لمنطقة زيّ دي. وإصابتها بأي ضرر تعتبر خسارة كبيرة لتراثنا، وخسارة لعنصر من عناصر جذب السياح. لإن المكان بيزوره سنويًا آلاف السياح المبهورين بتراثنا وتاريخنا على مختلف أشكاله سواء إسلامي أو غيره. مسجد الحسين واحد من أهم المساجد اللي بتعبر عن التراث الإسلامي في العالم. المسجد فيه مقنيات مهمة زيّ قطعة من قميص النبي محمد، وقطعة من عصاه ومكحلته وشعرتين من لحيته.
بالإضافة لنسختين من المصاحف بالخط الكوفي. واحدة منهم بخط يد الخليفة عثمان بن عفان والتانية بخط يد الخليفة علي بن أبي طالب.
المسجد مش هو عنصر الجذب الوحيد في المنطقة. لأ دي المنطقة كلها بتمثل عنصر جذب مش بس للأجانب، وللمصريين كمان خصوصًا في أوقات الأعياد وفي شهر رمضان. يعني هتلاقي في حلقات ذكر بتتعمل وخيم منصوبة لإفطار الصائمين.
مفيش حد بيزور المسجد وإلا لازم يعدي على منطقة خان الخليلي وشارع المعز واللي بيعتبر أكبر متحف إسلامي مكشوف. وحتى لو أنت ماتعرفش المنطقة. بس منظر الشوارع وشكل المحلات اللي ماليانة بالمشغولات اليدوية والحاجات القديمة والفولكلور المصري هيخلي رجلك تروح لهناك علشان تكتشف المكان. وأي حد جاي زيارة لمصر لازم أخر حاجة يعملها قبل ما يروح المطار. إنه يشتري هدايا تفكره باليومين اللي قعدهم هنا. سواء بقى هيشتري تماثيل أو لبس بيعبر عن الفولكلور المصري أو أنتيكات وسجاجيد ولوحات فنية.