أول ما تدخل الحياة العملية هتكتشف إن فيه مسلمات وبديهيات وشر لا بد منه، مش هتختاره بس هيتفرض عليك، زي الاجتماعات اللي بتضيع فيها حياتك وتسأل نفسك فيها أسئلة وجودية وتخرج بعدها مقرر إنك تقدم استقالتك، وزي إن يبقى في كتالوج للكلام في الشغل ومصطلحات لها أكثر من معنى زي “أنت ابن الشركة” واللي كان قصده بيها أنك “عبد الشركة” بس كان عايز يجيبهالك بشياكة، بس كل ده مقدور عليه، بس الشر اللي بجد والتدبيسة اللي ما بعدها تدبيسة اللي لازم تستعد لها وأنت داخل جديد على الحياة العملية هي “إيميلات الشغل”.
إيميلات في عالم موازي
الأيميلات اللي متراكمة عليا :
Posted by Mohamed Salama on Sunday, November 12, 2023
بشكل مبدأي الإيميلات تطور طبيعي للحمام الزاجل والفاكسات ولو بصيت للوقت اللي بيتاخد في وصول الرسالة وقتهم، هتندم على التطور التكنولوجي اللي وصلنا له، بسبب عبثيات الإيميلات دلوقتي، أولهم لإنها ببساطة مش صادقة في المشاعر خداعة وبتفاجئك، يعني إيه في بداية الإيميل تقولي “Dear” وانزل تحت شوية ألاقيك ماسح بكرامتي الأرض ومشردني وشاتمني بالأب والأم؟ طلب ليه “Dear” في الأول؟ ليه تبقى بوشين كده؟
والأنقح لما تبقى بتقول ” Hope This Email Finds You Well” اللي باعت لك الإيميل مش بيبقى شايف اللي بيحصل في الكواليس، ومش شايف الموظفين بيعملوا إيه في بعض أو بيقطعوا شعور بعض، هو من الأخر مش متهم إذا كنت كويس ولا لأ، هو مهتم بس لمصلحته.
واللي بيضايق كمان أن ظهورها كسر حتة الثقة اللي ما بينا، يعني إيه ابقى لسه طالب منك طلب أو حاكيلك على حاجة وبعد ما احكي وأخلص فضفضة تقولي “ابعت لي إيميل بالكلام ده”؟ طب ما أنا لسه قايلهولك؟ الإيميلات هي اللي بقت الحكم بينا؟ وخصوصًا الـCC ده بيضاف في الإيميل علشان يتفرج عليك وعلى مشاكلك وأنت بتتهزأ أو بيجيوه كشاهد، مع مصطلحات كتير بتدي معاني ثعبانية تانية زي “For your information” بمعنى “علشان ماتقولش إني ماقولتلكش” أو “Reminder” بيهزأك بشياكة ويعرف الناس أن التأخير مش منه، ليه
الإيميلات واخدة اهتمامات في حياتنا أكثر من اللازم، لدرجة أنها أول حاجة بنصحى عليها الصبح زي الـ”مورنينج تيكست” اللي بنستناها من الحبيبة، بس الفرق بينها وبين التانية إنها بتمتلك قدرة أنها تقفلك اليوم، خصوصًا يوم الأحد بيبقى ليها يد في تصعيب اليوم أكثر ما هو صعب، أو بعد الرجوع من الأجازة ناقص تجري وراك وبتفضل رايحة جاية لحد ما تنسى هو مين باعت إيه .. بس حاجة أخيرة ونصيحة موجهة للطيبين واللي دخلوا الحياة العملية بالغلط الإيملات دي حرب ناس كتير مش قدها وعلشان كده أهرب.