بواسطة منة حسني
سيناء مصر، أو زي ما بيطلق عليها “أرض الفيروز” مكانها بالظبط شمال شرق جمهورية مصر العربية في غرب قارة آسيا، و بتشكل تقريبـاً 6% من مساحة مصر الإجمالية. بتضم سيناء الكثير من المعالم المميزة، والمواقع المتنوعة في بيئاتها، زي مثلاً المزارت السياحية المشهورة، والمنتجعات السياحية، والمحميات الطبيعية زي محمية راس محمد، ومدن سياحية مشهورة زي شرم الشيخ، ودهب، وطابا، ونويبع.
وكمان في مجموعة من المزارات الدينية المقدسة زي دير سانت كاترين، وجبل موسي، وهو الجبل اللي كلم عليه ربنا النبي موسى وتلقي الوصايا العشر، وده وفقاً للديانات الإبراهيمية، وعلشان كده بتعتبر سيناء نقطة اتصال الأرض بالسماء..
إحنا جمعنالكم مجموعة من المزارات السياحية، والدينية اللي لازم كلنا نعرفها ونزورها في سيناء..
محمية نبق
أُعلنت نبق كمحمية طبيعية في سنة 1992، وبيقع مكانها بالظبط بين شرم الشيخ، ودهب علي خليج العقبة. بتتمتع المحمية ببيئات مختلفة، منها الصحراوية الجبلية اللي بيتخللها أودية مملوءة بالنباتات الطبيعية النادرة، فالمحمية بتضم أكثر من 134 نوع مختلف من النباتات، وكمان بتضم الشعب المرجانية في قاع مياهها، والأسماك، والمحاريات. والأرض الصحراوية فيها غنية بالغزلان، والأبل النوبي، والقوارض، والزواحف النادرة، والطيور المهاجرة زي البلشون، والعقاب النسارية. والمحمية بشكل عام بتعتبر من أفضل الأماكن لمحبي الغوص، ومراقبي الحيوانات.
جزيرة فرعون
الجزيرة دي بتتسمى برضه الجزيرة المرجانية، وهي بتتوسط قمة خليج العقبة، وبتبتعد عن طابا بحوالي 8 كم. وبتشتهر بقلعة صلاح الدين اللي بتعتبر من أهم الآثار الإسلامية في سيناء.
القلعة أنشأها صلاح الدين الأيوبي لتأمين خليج العقبة، وتأمين طريق الحج والتجارة، ولمراقبة المدينة وحمايتها من الغزو، خصوصًا بعد استيلاء أمير الكرك علي مكة والمدينة. بتحتوي القلعة علي أبراج كثيرة للحماية والمراقبة، وغرف للجنود والمعيشة، وأماكن لتخزين الذخائر، وأماكن لأبراج الحمام الزاجل المستخدم في المراسلة في العصور الوسطي، و صوامع للطعام وخزانات للمياه، ومسجد. ولما هتقف علي مرتفع القلعة هتقدر تشوف بسهولة حدود الدول المحيطة بحدود مصر، وهي فلسطين، و السعودية، والأردن.
الوادي الأحمر
الوادي الأحمر مشهور باسم الريد كانيون، وهو عبارة عن متاهة من الصخور والجبال الملونة نتيجة لزلزال من الآف السنين، والزلزال ده أدى إلى تكوينات صخرية ملونة وجميلة. والتكوينات دي أخدت تشكيلاتها الفريدة بفعل الرياح، والطقس، وعوامل التعرية الجوية اللي ادت الصخور أشكال بديعة بتخليها تبدو وكأنها كائنات حية متحجرة. وغير الوادي الأحمر، في مجموعة من الوديان الملونة في محافظة جنوب سيناء، واحد منهم بالقرب من طابا، والتاني بالقرب من نويبع.
مقابر هارون
هارون عليه السلام من أنبياء الله تعالى، ويؤمن به أتباع الأديان السماوية الثلاثة، وهو من ضمن الآثار اللي موجودة قريب من دير سانت كاترين. مقامه بيضم ضريح، وعلى الرغم من إنه مفيهوش جثمان، هو مكان مميز وله مكانة خاصة ومقدسة.
