مصر من أكتر الدول اللي الناس بتتجهلها لقضاء أجازتهم، وده لأنها معروفة بمناخها المعتدل اللي بيجذب السياح من كل دول العالم للإسترخاء علي شواطئها طول أيام السنة، والمعالم السياحية والآثار المتنوعة من العصور المختلفة اللي بتشمل آثار تاريخية، ومزارات دينية، وتعليمية، وكمان فيها سياحة علاجية.
بالرغم من انتشار المعالم دي في كل أنحاء البلد إلا إن تركيز السياحة سواء الداخلية أو الخارجية بيكون دايمًا علي بعض الأماكن المشهورة زي وادي الملوك والملكات في الأقصر، والمعابد التاريخية في أسوان، وسواحل البحر الأحمر، وجبل سانت كاترين، وأهرامات الجيزة، وعلشان كده قررنا إننا نتكلم النهاردة عن مجموعة من الأماكن الساحرة في مصر، واللي تكاد تكون مش معروفة خالص.
قلعة زمان
قلعة زمان موجودة بين مدينة طابا ومدينة نويبع، موقعها المتميز بيطل علي حدود مصر و فلسطين، وكمان تقدروا تشوفوا الحدود السعودية والأردن من القلعة. وهي موجودة في قلب الجبال، وأمام البحر، ومنحوتة بشكل صخري، وبتطل علي بحيرة صغيرة مصطنعة.
الوادي الملون
-4171492632600.jpeg){kind=link}
يُعرف الوادي الملون برضه بالكانيون، وهو موجود في محمية طابا، ويعتبر واحد من العجائب الطبيعية في مصر. الوادي عبارة عن متاهة من الصخور الملونة اللي بيصل طولها لـ ٤٠ متر. والوادي الملون اتكون نتيجة عن الأمطار والسيول اللي حفرت قنوات بين الصخور على مر السنين.
مدينة شالي
مدينة شالي موجودة في قلب الصحراء الغربية وسط واحة سيوة، ووجود معبد آمون فيها دليل علي إن المدينة دي بيرجع تاريخ إنشأها إلى آلاف السنين. وفي القرن الثالث عشر، بنيت في المدينة قلعة اتعرفت باسم ”قلعة شالي“ وكان الهدف منها حماية سيوة لما سادت الفوضي في الصحراء الغربية بعد عصر الأمبراطورية الرومانية.
المدينة دي مبنية من طوب اللبن المكون من الرمال، والملح، والماء، وفضلت صامدة على مر العصور، بس للأسف مع زيادة الأمطار والسيول في القرن العشرين انهدمت المباني، ولجأ أهلها لبيوت جديدة في واحة سيوة.
بحيرة النيزك
تقع بحيرة النيزك علي بعد ١٤ كيلومتر من جنوب مرسي علم، وبتتميز مياه البحيرة بالنقاء، ولونها العذب، واعتدال درجة حرارتها. وبينتسب اسم البحرية إلى الأسطورة اللي بتقول إن في نيزك هبط من السماء علي الأرض فكان سبب في تكون البحيرة دي من مياه البحر.
الصحراء البيضاء
تقع الصحراء البيضاء على بعد ٤٥ كيلومتر من واحة الفرافرة بمحافظة الوادي الجديد. سميت بالاسم ده بسبب انتشار الرمال البيضاء اللي بتغطي معظم سطح الصحراء، وفي ٢٠٠٢ تم إعلان الصحراء البيضاء كواحدة من المحميات الطبيعية المصرية اللي بيزيد عددها عن 30 محمية.
جزر الجفتون
جزيرة الجفتون بتعتبر من أوائل المحميات الطبيعية في البحر الأحمر، وهي الجزيرة الوحيدة المسموح بزيرتها للسياح هناك. جزر الجفتون بتتكون من مجموعة جزر، منها جزيرة الجفتون الكبري واللي بتصل مسحتها لـ ١٨ كيلومتر مربع، وجزيرة الجفتون الصغري واللي بتصل مساحتها لـ ٣ كيلومتر مربع، وبتتميز جزيرة الجفتون بمواقع الغوص والرمال الناعمة.
محمية وادي الجمال وجبل حماطة
المحمية دي موجودة في جنوب محافظة البحر الأحمر، وبتوصل مساحتها لـ ٧٤٥٠ كيلومتر مربع، وبتطل علي ساحل البحر الأحمر بطول ٦٠ كيلومتر. بتتميز المحمية بوجود الكثير من الكائنات الحية والحيوانات النادرة زي الغزال، وحيوان التيتل، والنسر العقاب، وصقر الغروب النادر تواجده في الكثير من الأماكن السياحية الساحلية، وكل ده بالإضافة للجمال اللي متواجدة بكثرة في المحمية.
ولعشاق تسلق الجبال، بتضم المحمية جبل حماطة اللي بيعتبر من أعلي جبال الصحراء الشرقية.