بواسطة فرح أشرف.
من الخطوات الأولى للحفاظ علي البشرة، معرفة نوعها، وطبيعتها علشان نعرف نتعامل معاها صح، ونقدر نستخدم المكونات اللي ممكن فعلاً تفيدها. كل البشر بيشتركوا في أربع أنواع للبشرة، وهما البشرة الدهنية، والجافة، والمختلطة، والعادية. وعلشان نتعرف علي نوع بشرتنا، ممكن نقوم بزيارة طبيب جلدية مختص، أو عن طريق الخطوات التالية:
- نغسل وجههنا كويس جداً من أثار أي مكياج، او تراب، أو عوامل خارجية.
- ننشف الوجه عن طريق مناديل ورقية، و نسيبه يجف لمدة ساعة.
- بعد الساعة دي، نجرب نضغط بمناديل ورقية ناعمة على جميع المناطق بالوجه زي الجبين، والأنف، والجبهة، والذقن، والخدود، ونفحص أثار المناطق دي بدقة على سطح المناديل، وبعد كده هتكونوا قادرين على تحديد نوع بشرتكم حسب النتائج التالية:
- إذا كانت بشرتكم من النوع الدهني فهتلاقوا أثار الزيوت الدهنية في مناطق الأنف، والجبين، والجبهة، والذقن، وده لأن إفراز الدهون بيكون زيادة في حالة نوع البشرة ده.
- ولو كانت البشرة مُختلطة فأثار الدهون هتكون في مناطق الأنف، والجبين، وباقي المناطق كالذقن، والخدود هتكون جافة.
- ولو كانت البشرة من النوع الجاف فمش هتلاقوا أي أثار للدهون على وجهكم، وهتلاقوا المناديل جافة تماماً، مقابل وجود القليل من القشور البيضاء دلالة على جفاف البشرة وتقشرها. وده لأن النوع ده من البشرة بينتج دهون أقل من الجلد الطبيعي نتيجة لنقص الدهون في الوش sebum، ودي بنحتاجها للاحتفاظ بالرطوبة، وبناء درع وقائي ضد التأثيرات الخارجية.
- وبالنسبة لأخر نوع بشرة، وهو النوع العادي، فهتلاقوا المناديل نظيفة تماماً، ومش هيكون في أي أثار للدهون، أو القشور عليها أبداً، وهو ده نوع البشرة المتوازنة بشكل جيد.
وعشان نحافظ علي نضارة بشرتنا أياً كان نوعها، هنعرضلكم اقتراحتنا لمجموعة من الماسكات المنزلية المناسب لكل نوع بشرة:
- ماسك البرتقال للبشرة الدهنية بيتم تجفيف قشر البرتقال قبل طحنه جيداً، وتحويله لمسحوق، وبعد كده بيتم خلط مسحوق البرتقال مع الماء، واللبن لعمل الماسك قبل وضعه على البشرة.
- ماسك الموز والعسل وزيت الزيتون للبشرة الجافة بنخلط كل المكونات مع بعض بشكل جيد. والكمية بتكون، معلقة كبيرة من كل مكون لحد ما بنحصل على خليط متجانس، وبعد كده بنحط الخليط ده على البشرة، وبيتشطف كويس بعد 10 دقائق.
- ماسك الخيار والعسل للبشرة المختلطة بيتم بشر ثمرة خيار واحدة بشكل ناعم جداً، وبنضيف ليها ملعقة عسل صغيرة، ولبن قليل. وبعد كده بيتم مزج المكونات لحد ما تتحول لما يشبه الكريم، ووبيتوزعوا على الوجه لمدة ربع ساعة.
- ماسك الأفوكادو للبشرة العادية ½ ثمرة أفوكادو لينة ، و¼ كوب عسل. بنهرس الأفوكادو، ونضيف عليه العسل، وبنحطه على وشنا لمدة 10 دقائق، وبعد كده بيشطف الوجه، ويجفف بمنشفة باردة.