مش هنقول إن “من زمان” لا ده من قبل الزمن أصلًا، بداية التاريخ والحضارة، وحتى في بدايات حياة الإنسان البدائي، الستات كان ليهم دور في كل حاجة، حتى الصيد، وكل طرق المعيشة والاستمرار في الحياة، كانت بتدور على الأكل، ترعى البيت وأولادها، ولو قدرت تشتغل بتعمل ده، الست قدرت تحكم بلاد كاملة بكل شئونها، ومش مجرد فترة حكم بتتحسب في التاريخ وخلاص، لأ فترة حكم بيحكي ويتحامى بيها الكل لحد دلوقتي حتى بعد مرور آلاف السنين عليها، بتسأل مين هي الست؟ تعالى نشوف قصص تقولك هي مين.
مش عايزين كلام كليشيه عن حكم كليوباترا، شوف من امتى؟ ولحد دلوقتي بنفتخر بالعقلية الإنسانية اللي خلت كليوباترا ملكة البلاد.. طب لحد دلوقتي، تعرف كام بيت في مصر المسئولة عنه بالكامل ست؟ مش بس ماديًا ومش هنجيب تقارير بتحصد الست بتعيل كام بيت، المسئولية هنا مش بس في الفلوس، مسئولية تربية أفراد، مسئولية تعليمهم وأكلهم وشربهم وتفاصيل حياتهم اللي تخليهم بني آدمين أسوياء، دي مش مهمة تعتبر معجزة؟ مش بس تأدية واجب على أكمل وجه.
حابين نستشهد بمقال صغير كتبه الكاتب عمر طاهر بمنتهى السلاسة، بيتكلم فيه عن مثل مصري أصيل، وعلاقته بالست، فقال: “أعتقد إن نظرية ماحدش بينام من غير عشاء الرهان فيها على وجود الست على كوكب الأرض. لو الكوكب كله رجالة، نصهم هيناموا عادي من غير عشاء وماحدش هياخد باله. بيقول عطاء الله السكندري إن مش العضلات اللي بتحرك اللبن ف صدر الأم، الحنان هو المسئول عن ده أولًا.. يمكن كلام مش علمي بس الأمهات تعرف مصطلح الصدر بيحن لما بتسمع بكاء طفلها. معجزات تموين البيت و خزينُه اختبار مافيش راجل في التاريخ نجح فيه غير سيدنا يوس .. حاجة كانت محتاجة راجل نبي، لكن الست بتعملها كل يوم وهي سايبه إيدها. فالست بفطرتها موكولة للقمة وبتجري بيها ورا الابن والزوج والحفيد والضيف وعريس بنتها وأصحاب ولادها وبيت الجيران فتلاقي ماحدش بينام من غير عشاء.”
بمنتهى الحب، والإحساس بالمسئولية، مش علشان نيجي على حد، أو نقول احنا بنعمل وبنسوي، مش محتاجين ندخل خناقات ومناقشات تعتبر “مهاترات” علشان نثبت حقايق موجودة ومتشافة بالعين لأي حد.
من ناحية فلسفية، سقراط قال “المرأة أحلى هدية قدمها الله إلى الإنسان. متى أتيح للمرأة أن تتساوى مع الرجل أصبحت سيدته. المرأة مصدر كل شيء”.. وأفلاطون قال” النساء مخلوقات حدسيّة، ولو كان الحدس معيارًا وحيدًا للبقاء على الأرض فإنها كانت ستخلو من الرجال منذ زمن بعيد”.. وإبراهيم الكوني قال “من الأبله الذي قال أن المرأة مخلوق ضعيف؟”
أما من ناحية دينية، رُوِي عن المقدام بن معد يكرب الكندي، عن رسول الله صلى الله عليه وسلّم أنّه قال: (إنَّ اللهَ يُوصِيكُم بالنساءِ خيرًا، إنَّ اللهَ يُوصِيكُم بالنساءِ خيرًا، فإنهنَّ أمهاتُكم وبناتُكم وخالاتُكم، إنَّ الرجلَ من أهلِ الكتابِ يتزوجُ المرأةَ وما تُعلَّقُ يداها الخيطَ، فما يرغبُ واحدٌ منهما عن صاحبِه حتّى يموتا هَرمًا).
وقصص كتير، على مدار أزمنة، ولسه مش هتنتهي عن قيمة الست.. لإن الست مش مجرد لبسها، مش هنسيب كل حاجة ونقول نلبس إيه ومانلبسش إيه، أو ييجي حد بعد كل ده يحط حياتنا في كفة ولبسنا في الكفة التانية، يا تلبسي كذا يا تموتي.