بواسطة فرح أشرف.
كلنا سمعنا امبارح الثلاثاء عن الحادث الأليم اللي حصل في بيروت، لبنان. الانفجار كان في منطقة مرفأ بيروت، وسببه كان وجود عنبرمتخزن فيه 2750 طن من مادة نترات الأمونيا شديدة الانفجار. صوت التفجير لوحده اتسمع في جزيرة قبرص اللي بتبعد عن لبنان حوالي 320 كيلومتر.
فيديو الانفجار انتشر في خلال دقائق على السوشيال ميديا، وشفنا فيها إزاي جزء كبير من العاصمة اللبنانية اتدمر. من بيوت اللبنانيين، ومواقع سياحية ومولات لمستشفيات وبيوت أزياء كبيرة، الدمار مفرقش. وكونه كان في وسط البلد ببيروت زوّد من وقعه.
كتير من نجوم الفن زيّ هيفاء وهبي وراغب علامة وإليسا نشروا صور لبيوتهم بعد تدميرها. ودي صور لمنزل راغب علامة اللي نشرها ابنه علي حسابه الرسمي على تويتر.
هيفاء وهبي نزلت صور بيتها اللي تم تكسيره بفعل الانفجار وطلبت من متابعيها الدعاء لربة منزلها بالشفاء العاجل.
و حاليًا لبنان بتعيش حالة حداد كبيرة لأن الانفجار وقع على أثره أكتر من 100 قتيل و4000 مصاب على الأقل. مؤكد أثر الانفجار على المنازل و المباني كان قوي والمؤكد أكتر إن تاثيره علي النفوس كان أقوى ورهبته أكبر. رحم الله لبنان و اهلها.