إيه أحسن من إن في وسط زحمة الحياة والمشاكل، إنك تنعزل عن العالم وتقعد لوحدك ومعاك الآيس كريم في إيدك، وتتفرج على حلقات متتالية من مسلسلك المفضل؟ ومهما تقول إن دي آخر حلقة هتتفرج عليها.. انت عارف كويس إنك مش هتقوم إلا وانت مخلص المسلسل كله.. هي دي المتعة الحقيقية! بس للأسف بعد ما بنخلص كل الحلقات، بنحاول نتخطى ألم فراق شخصياتنا المفضلة بإننا نتفرج على مسلسل تاني يشتت تفكيرنا.. بس دايمًا بيبقى جوانا حزن كده على المسلسل اللي خلص مش قادرين نتغلب عليه.
فلو انت من الناس دي وقادر تحس بالمعاناة، ولو انت كمان من محبين مسلسل الآنسة فرح، فعايزين نقولك إن النهارده يومك السعيد.. فريق العمل كان بقالوا فترة طويلة بيصور فيه، ولكن كان كل شوية بيتم تأجيل العرض.. وأخيرًا فريق العمل أعلن إن التاريخ النهائي لعرض المسلسل هيكون يوم 15 نوفمبر على منصة “Shahid VIP” ونزلت الصفحة الرسمية للمنصة البرومو الرسمي للمسلسل علشان يأكدوا ميعاد العرض.
وواضح إن مش بس جمهور المسلسل هو اللي متحمس لبداية العرض، ولكن أبطاله كمان، فنشرت الفنانة مريم الخشت بوست ترويجي للمسلسل بتحمس فيه المشاهدين وبتوعدهم بمفاجأت جديدة في الجزء ده، و”الآنسة فرح” من بطولة أسماء أبو اليزيد، ورانيا يوسف، وأحمد مجدي، ومحمد كيلاني، ومن إخراج أحمد الجندي ووائل فرج. والمسلسل مقتبس عن مسلسل أجنبي “Jane the Virgin”.
وحقق المسلسل نجاح كبير في مصر والوطن العربي، رغم إن قصته كان بيعتبرها البعض إنها مش مناسبة للثقافة والمجتمع المصري اللي مش متعود على تناول الأفلام والمسلسلات للنوع ده من المواضيع.. فالمسلسل بيدور حوالين نادلة بسيطة، اللي عن طريق الخطأ بتتحقن وتبقى حامل وهي عذراء، وتناول موضوع زىّ ده سبب كتير من الجدل وقت نزوله وتوقع ناس كتير إن المسلسل ميكملش ولا ينجح، ولكن في النهاية وعكس كل التوقعات، تفاعل معاه الجمهور بشكل إيجابي وبقى مستني كمان الأجزاء اللي جاية.