مجلة فوربس العالمية اختارت عين دبي ضمن أفضل الأماكن اللي تزورها في 2021 و2022، اللي من المقرر افتتاحها السنة دي، وهي أكبر عجلة ترفيهية في العالم، وبتوفر العجلة إمكانية مشاهدة أفق دبي من جوا كبسولة مغلقة بالزجاج وبزاوية 360 درجة على ارتفاع 820 قدم، وبكده بتتخطى “عين لندن” في المملكة المتحدة، و”هاي رولر” في لاس فيجاس بالولايات المتحدة، وبتكون أكبر عجلة دوارة في العالم.
آخر التطورات في تجهيز العجلة للافتتاح السنة دي زيّ ما تم الإعلان، إن تم إزالة عمود الدعم المؤقت الثامن والأخير، وتم تركيب أوتار التثبيت الدائمة، وبكده بيكتمل هيكل العجلة النهائي لأول مرة، وتم بشكل مؤقت تثبيت الإطار الفولاذي الخارجي للعجلة بالمحور، باستخدام 8 أعمدة دعم ضخمة، وزن كل واحد فيهم حوالي 450 طن.
عملية التثبيت بتتطلب مستوى عالي من التنسيق للقيام بسلسلة مناورات هندسية معقدة ماحصلتش قبل كده، وبعد كده بيجي دور عملية البدء في تركيب أوتار التثبيت النهائية بالتزامن مع إزالة الأعمدة المؤقتة على مراحل، وعملية تثبيت الإطار بمراحله المختلفة استغرقت سنة كاملة، ودلوقتي الحجم الهائل للمشروع بقى باين للناس.
وستطل “عين دبي” على المناظر الجميلة لساحل دبي والمارينا، وبرج العرب ونخلة جميرا وبرج خليفة، وهيبقى فيها 48 حجرة مكيفة كل واحة فيهم تكفى لـ 30 شخص، يعني إجمالي سعة العجلة هيبقى حوالي 1440 شخص، والعجلة هتاخد 50 دقيقة أو أكتر علشان تكمل دورة كاملة في الدوران.