غضب كبير سيطر على السوشيال ميديا بعد انتشار قصص لناجيات من التحرش والاغتصاب كمان من مخرج مصري مشارك بفيلم في الدورة الـ 42 من مهرجان القاهرة السينمائي الدولي، الشهادات من البنات بتتهمه بالتحرش وفي منهم وصل للاغتصاب، وتكرر الأسلوب مع بنات ميعرفوش بعض، وبعدها صدرت قرارات من المهرجان ضد المخرج، فتعالوا نشوف إيه اللي حصل؟
بعد أكتر من شهادة اتنشرت على مدونة حكايات، بتتهم المخرج المصري إسلام العزازي اللي بيشارك السنة دي بفيلم “عنها” في مهرجان القاهرة السينمائي الدولي، سيطرت حالة من الغضب على السوشيال ميديا بتطالب بالتحقيق في الشهادات دي وبتطالب كمان باتخاذ قرار واضح من إدارة المهرجان تجاه الواقعة دي.
الشهادات ظهرت بالتزامن مع عرض فيلمه في المهرجان، والاحتفاء بيه كمخرج بيساند القضايا النسائية، فقررت صاحبات القصص والشهادات دي الخروج عن صمتهم.
لكن إدارة المهرجان ردت بشكل سريع ببيان وضّح الاحترام الكامل للمرأة ورفض كل أشكال العنف ومن بينهم التحرش، وأكدوا على متابعتهم باهتمام لكل اللي تردد بخصوص الموضوع، وردت كمان بخصوص الفيلم المشارك في المهرجان.
وبعدها بساعات، أعلنت إدارة المهرجان على الصفحة الرسمية على الفيسبوك، إلغاء المؤتمر الصحفي الخاص بالفيلم.
مع مطالبات الجمهور بمنع المخرج نفسه من حضور المهرجان، مع عدم الضرر بالفيلم نفسه لإنه بيشارك فيه فريق عمل كامل مالوش ذنب بتصرفات المخرج شخصيًا وصعب ظلم العمل كله بسبب فرد فيه.