الفنان مُصعب ريحان، شاب بسيط من بورسعيد عنده 23 سنة، اتخرج من كلية العلوم سنة 2018، بدأ يدخل في عالم الفن ويرسم من وهو عنده 10 سنين، وبدأ مخصوص في رسم الجرافيتي من 3 سنين، يعني كان عنده 20 سنة، وهو بيشتغل وبيرسم كل أعماله لوحده، وبعد ما فن مُصعب لفت نظرنا، عملنا معاه حوار كلمنا فيه عن فنه، وأعماله، وشغفه.
اختار الفنان مُصعب فن الجرافيتي بالذات لإن نفسه يغير شكل البيوت والشوارع بالألوان، وفن الجرافيتي بالنسبة له كل حاجة، وبيمثل هوايته وشغله، وبيعمله علشان بيحبه، وعلشان يغير مكان من قديم لجديد، والناس بتنبهر بيه، فأهل منطقته بيشجعوه جدًا من البداية، واستغربوا طبعًا لما شافوا الموضوع في الأول لإنهم مش متعودين عليه، فهو فن مختلف عن الفن التقليدي، لكن بعد كده حبوا فنه جدًا، وحبوا إنه يجدد أكتر في البيوت والشوارع.
وريحان بيرسم بتلقائية حاجات شكلها حلو بتغير من المكان، وتخلي الناس تحبها وتحب تتفرج عليها وتتصور جنبها.. لكن علشان يرسم في الشارع بيكون محتاج يأخد تصريح الأول، فدلوقتي بيرسم على بيته أو بيوت أصحابه، وساعات ناس بتكلمه مخصوص علشان يرسملهم زيّ أصحاب المحلات والصالات الرياضية اللي مابتكونش في شوارع عمومية فمش بيحتاجلها تصريح.
مُصعب ريحان قدر يحول الشوارع من مجرد طوب وحيطان للوحات فنية، واستخدم الجرافيتي أو فن الشارع علشان يلون وينور الشوارع برسوماته الجميلة.
