مطار الغردقة النهارده استقبل الفوج السياحي الروسي اللي جه على متن أول رحلات الطيران المباشر من روسيا لمطار الغردقة بعد توقف 6 سنين بعد حادثة وقوع الطائرة الروسية في 2015، الفوج الأول للسياح على متن الطائرة دي بيضم حوالي 300 سائح، وتم استقبالهم باستقبال حافل بالورود والموسيقى والهدايا التذكارية، وكمان تزويدهم بمعلومات عن السياحة في مصر والأماكن السياحية المميزة، ودي هتكون بداية لعودة تنشيط السياحة في مصر بأفواج روسية.
لمياء كامل مساعدة وزير السياحة والآثار كانت في استقبال الفوج الروسي في مطار الغردقة، وصرحت بإن السياح أعربوا عن سعادتهم برجوع الرحلات مرة تانية لمصر وخصوصًا للبحر الأحمر والمنتجعات هناك اللي بيفضلوا يقضوا أجازتهم فيها وهما بيستمتعوا بالشواطئ والبحر، والأنشطة المختلفة. وصرحت كمان بإن ردود فعل السياح وانطباعهم عن مصر اللي هيتكلموا عنه لما يرجعوا بلدهم، ده أكبر اعلان ترويجي لمصر كوجهة سياحية.
وفي بيان نشرته سفارة روسيا في مصر في شهر يوليو، أعلنت إن بداية من 9 اغسطسن هتنطلق رحلات أسبوعيًا من موسكو للغردقة وشرم الشيخ، وبناءًا على نتيجة زيارة الوفد الروسي لمصر اللي هيقوم بتقييم الوضع الوبائي، هيتم تحديد عدد الرحلات الجوية للمدينتين، واللي غالبًا القرار هيكون بزيادة عدد الرحلات، لاستقرار الوضع الوبائي نسبيًا في مصر.