بعد الفوز بالمركز التاني لأفضل وجهة غوص في العالم.. أجمل أماكن للغوص في مصر

للمرة التانية على التوالي، مصر بتفوز بالمركز التاني لأفضل وجهة للغوص في العالم، في التصويت اللي عملته مجلة “Dive” البريطانية في 2020، مصر بقت وجهة لمحبي الغوص والرحلات البحرية المختلفة، خصوصًا في البحر الأحمر والمياه الزرقاء الصافية اللي فيه والشمس الدافية على مدار السنة، والشعاب المرجانية اللي بتشد اهتمام الكتير من الناس من كل العالم، وفيه حوالي 60 مكان للغوص في البحر الأحمر.. علشان كده هنأخدكم في لفة لأجمل أماكن للغوص في مصر.

البلو هول

من أشهر وأجمل المناطق في مصر للغطس والأنشطة البحرية في مصر، تحديدًا في دهب بالبحر الأحمر، وهي عبارة عن سرداب أو حفرة عميقة في البحر بعمق 130 متر مع فتحة للخروج من الثقب أو البئر الأزرق ده للبحر المفتوح، والمنطقة دي بتشد انتباه الغواصين وفيها أسماك ملونة نادرة، وشعاب مرجانية ساحرة.

حطام أبو غصون

من أجمل مناطق الغوص في البحر الأحمر، وهي مكان حطام سفينة تجارية غرقت سنة 1993 بعد ما اتعرضت لعاصفة جامدة خلتها تصطدم بحاجز صخري قسمها نصين، ومع الوقت بقى المكان موطن للأسماك والمخلوقات البحرية النادرة اللي بتتميز بيها المنطقة، وتم تصنيفها من عجائب مرسى علم السبعة، وبقت مقصد للسياح من كل مكان في العالم.

بيت الدلافين

منطقة في مرسى علم فيها مجموعة من الدلافين بتعيش في منطقة الشعاب المرجانية، وبتجذب السياح للغوص مع المخلوق الجميل ده، اللي المكان ده يعتبر أكبر تجمع ليهم في أفريقيا والشرق الأوسط، والمنطقة متقسمة لتلاتة، منطقة خاصة باستراحة الدلافين وممنوع أي حد يدخلها، ومنطقة للغطس، ومنطقة لوقوف المراكب.

جزيرة الجفتون

في الغردقة، وبتضم 14 موقع من أجمل مواقع الغطس، وكمان في فرصة إنك تشوف سمك البراكودا والتونة، وهي الجزيرة الوحيدة اللي مصرح فيها بإقامة أنشطة سياحية، وبتتميز برمالها الناعمة وشواطئها الجميلة.

خليج مكادي

هو مكان مش معروف كتير للسياح، وخليج مكادي بين الغردقة وسفاجا، وهو مكان من أجمل أماكن الغوص في البحر الأحمر، واختيار حلو جدًا للغوص وسط الشُعب المرجانية والمياه الصافية في المكان النادر ده.

القُصير

ما بين الغردقة ومرسى علم، جزيرة تاريخية عمرها أكتر من 5000 سنة، بتتميز بوجود مناطق للغوص عمقها صغير جدًا مناسب للمبتدئين للتدريب على الغوص، ومتعة الغوص في القُصير بتكون علشان تشوف الشُعب المرجانية، وأسماك زيّ سمكة الأسد، تعابين البحر، سمكة الجيتار، وغيرها كتير من أنواع الكائنات البحرية.

جزيرة فرعون

قريب من ساحل طابا، وهي جزيرة من أحلى الأماكن للغوص في مصر، وكمان بتطل على السعودية والأردن، وده بيخليها مميزة ونادرة، ووجهة للسياح من كل مكان في العالم.

آخر كلمة: ماتفوتوش قراءة: “حلم ده ولا خيال”.. كل اللي محتاجين تعرفوه عن بحيرة النيزك الفيروزية بمرسى علم.