الفنان آدم الشرقاوي “بيج زي” سفير لمبادرة “اتكلم عربي”

بعد ما شوفناه في رمضان في مسلسل لعبة نيوتن، واتشهر وحقق نجاح كبير في المسلسل، آدم الشرقاوي أو زيّ ما معروف بـ “بيج زي”، تم اختياره من وزيرة الهجرة وشئون المصريين بالخارج، علشان يكون سفير لمبادرة “اتكلم عربي” اللي هدفها تعليم وتثقيف أبناء مصر في الخارج بلغتهم العربية وزيادة ارتباطهم بيها، وتعريف الشباب بتاريخهم وحضارتهم العريقة، وبإنجازات بلدهم في الفترة الحالية، تعالوا نعرف أكتر عن المبادرة دي واللي حققته من وقت انطلاقها، وازاي أدم الشرقاوي يعتبر ممثل جيد ليها.

المبادرة تم اطلاقها من أكتر من 6 شهور، وبتدعم تعريف شباب مصر في الخارج ببلدهم ولغتها وربطهم بيها، في ظل تعرضهم لحرب طمس الهوية وهما بيتعرضوا لثقافات تانية، مع التأكيد إننا مش ضد تعلم لغات تانية والانفتاح على الثقافات المختلفة، لكن لابد من عدم إغفال لغة وطنهم، وفي تقارير اتعملت عن المبادرة والانجازات اللي حققتها، ضمنهم إن الفيديوهات اللي اتعملت من المبادرة حصدت أكتر من 174 مليون مشاهدة ومشاركة على السوشيال ميديا، من أبناء مصر في الخارج من أبناء الجيل الثاني والجيل الثالث للأطفال.

وكمان تم إطلاق أكتر من 15 معسكر لأبناء الجيل الثاني والثالث من المصريين بالخارج، في بلاد مختلفة زيّ النمسا والإمارات وكندا وأمريكا وألمانيا والسويد والبحرين وإنجلترا واستراليا وفرنسا وبلجيكا وإيطاليا، علشان يتم تقديم جرعة ثقافية وحضارية لأبناء مصر بالخارج، تعرفهم بحضارتهم وتاريخهم العريق اللي العالم كله بيتكلم عنه ويحترمه.

آدم الشرقاوي، اللي اتشهر مؤخرًا وهو من الجيل الثاني والثالث لأبناء المصريين بالخارج، حتى وهو بيتكلم عربي مكسر، واتعلم عربي مؤخرًا في مشاركته في مسلسل لعبة نيوتن في رمضان اللي فات، لكنه نال شهرة كبيرة بين المصريين هنا وفي الخارج، وعلشان كده، كان اختيار جيد إنه يكون سفير للمبادرة. كمان بعد اختياره، أعلن إنه على أتم الاستعداد لتشجيع أبناء المصريين بالخارج للتحدث باللغة العربية.

آخر كلمة: ماتفوتوش قراءة: ميكس “بلادي بلادي” و”إسلمي يا مصر” لمبادرة اتكلم عربي