شوفنا وسمعنا في الكام ساعة اللي فاتوا تصريحات اتقالت على لسان رئيس وزراء إثيوبيا آبي أحمد بخصوص أزمة سد النهضة، تصريحات ضربت بكل القوانين الدولية عرض الحائط، وماعملتش حساب لأي دولة من دول حوض النيل ومصر أولهم، استقبلت مصر التصريحات بغضب ونفور شديد لإنها كانت تصريحات فيها نبرة تهديد وعدم احترام لمكانة مصر وسط المجتمع الدولي والعربي.
الموضوع بدأ بتصريح من آبي أحمد عن نية إثيوبيا في بناء 100 سد صغير ومتوسط في مناطق إقليمية مختلفة في السنة المالية الجديدة، وإن ده هيبقى ليه دور في الإنتاج الزراعي في المنطقة عندهم، وده كان من ضمن الوعود الانتخابية لكسب تأييد شعب إثيوبيا.
بعد التصريح ده بدأت وسائل الإعلام المصرية تتكلم، ووزارة الخارجية أصدرت بيان على لسان السفير أحمد حافظ المتحدث الرسمي باسم وزارة الخارجية، بإن مصر بترفض كل اللي اتقال في تصريحات آبي أحمد وإن التصريحات بتكشف عن سوء نية إثيوبيا في التعامل مع الأزمة، وإن من حق الدول تعمل مشروعات مائية من أجل تحقيق التنمية لشعوبها، بس ده بيتعمل بعد التنسيق والتشاور مع الدول اللي ممكن تتأثر بالمشاريع دي، وخصوصًا دول المصب، وإن كل اللي اتقال من جانب إثيوبيا يعتبر كسر لقواعد القانون الدولي. وكإنها أنهار داخلية تخضع لسيادتها ومسخرة لخدمة مصالحها هي بس.
بجانب تصريح الخارجية، كان في جانب من وسائل الإعلام واللي كان ليه رد فعل عنيف برضه تجاه الكلام ده زيّ الإعلامي أحمد موسى وعمرو أديب.
