أول يوم تلات من شهر مايو كل سنة، هو يوم التوعية بمرض الربو، وفي المبادرة العالمية بنحاول نزود الوعي حول المرض والتحكم فيه.
بتركز التوعية على أعراض الربو وازاي يقدر المريض يتحكم فيها، وتوعية الممارسين الصحيين بأهمية التشخيص الصح والتثقيف عن التحكم في المرض، ودعم المصابين بالربو وتوعيتهم بأهمية تجنب الحاجات اللي بتثير أعراض المرض.
إيه هو مرض الربو وإيه مسبباته؟
علشان تعرف تتعامل مع مريض ربو من الناس اللي حواليك، لازم تثقف نفسك عن المرض، ومن أول الحاجات اللي لازم تعرفها هي تعريف المرض والحاجات اللي بتسبب أعراضه.
مراكز السيطرة على الأمراض والوقاية منها، بتعرف الربو بإنه مرض يؤثر على الرئتين، وهو واحد من أكتر الأمراض طويلة المدى شيوعًا عند الأطفال، وبيصيب البالغين كمان.
وفي نوبات الربو بتضيق المسالك الهوائية، وبتورم، وتفرز كميات مبالغ فيها من المادة المخاطية، وده بيسبب صعوبة في التنفس.
بتحصل نوبات الربو نتيجة تعرض المسالك الهوائية لحاجات بتسبب تهيج، زيّ الغبار وحبوب الطلع والمواد الكيميائية وريش الطيور والفرو، وكمان الإصابات الفيروسية في الجهاز التنفسي وبعض السوائل والأطعمة والمواد الحافظة.
ازاي نتعامل مع مريض الربو في حياتنا اليومية؟
لحد دلوقتي، مافيش علاج شافي من الربو، ولكن كل العلاجات اللي بنستخدمها النهارده بتساعد على التحكم في أعراض المرض، وأكتر حاجة نساعد بها المريض هي إننا نشجعه وندعمه في مراقبة المرض والتحكم في أعراضه.
من أهم وسائل مراقبة المرض والتحكم فيه، هي إن المريض يعمل إشراف ذاتي من خلال كتابة مذكرة يومية عن نوبات الربو علشان يتحكم في المرض، والمذكرة بتسجل أعراض المرض اليومية وعدد النوبات، ومتابعة عدد المرات اللي أخد الأدوية الإسعافية.
بيساعد تسجيل المعلومات دي المريض في التعرف على مؤشرات نوبات الربو الأولى، وبتساعد المعلومات دي الطبيب في تقييم درجة المرض وتحديد خطة العلاج.
المذكرة دي لازم يعملها المريض بنفسه، ومانقدرش نعملها له، ولكن نقدر نشجعه ونفكره وندعمة في الرحلة، لإن المذكرة ممكن تكون مملة ومرهقة.
من الحاجات المهمة برضه اللي لازم نساعد المريض فيها، إنه يتجنب الحاجات اللي بتزود أعراض المرض، زيّ الوجود مع ناس عندها فيروسات تنفسية زيّ الإنفلونزا والكورونا، ويتجنب التعرض للغبار وغيره من مثيرات الحساسية.
نساعده ونفكره يفضل على تواصل مع الطبيب بتاعه، ومراقبة خطة العلاج وتحديث الملف الطبي في المستشفى أو العيادة اللي بيتابع معاها، ولازم نساعده يحافظ على نظام غذاء صحي وممارسة التمارين الرياضية والامتناع عن التدخين.
ازاي نتعامل مع مريض ربو عنده نوبة؟
لما بيتعرض مريض الربو لنوبة، ويمر بأعراض الاختناق التنفسي، في حاجات ممكن نعملها علشان نساعده، لما يتعرض المريض للاختناق لازم نساعده يقعد فورًا، ونتأكد إنه مش هيبذل أي مجهود، ونطلب منه يتنفس من الأنف، لإن ده بيساعده يدفي المسالك الهوائية والرئة، وبالتالي بيقلل أعراض النوبة.
لازم نساعد المريض يستخدم جهاز الاستنشاق بشكل صحيح علشان يوصل الدواء للجهاز التنفسي، لازم نبعد المريض عن الأماكن اللي بتنتشر فيها مسببات الحساسية زيّ الروائح النفاذة والمواد الكيميائية.
ننصح المريض ماينفعلش أو يتعرض للتوتر والقلق أثناء نوبة الربو، علشان ماتزيدش النوبة وتتحول لاختناق، وبعد ما يستخدم المريض جهاز الاستنشاق وياخد الأدوية بتاعته، ممكن نقدم له سوائل دافية زيّ اليانسون والنعناع، علشان نساعده يهدي الكحة ويقلل من الاختناق.
لو زادت أعراض النوبة والمريض ماتحسنش، لازم نكلم الإسعاف علشان ننقله للمستشفى فورًا، علشان ممكن الحالة تزيد ويتعرض المريض للاختناق.