هند صبري فنانة قدرت تجسد شخصيات وأدوار مختلفة وعرفت ازاي تخرج من جلدها وتفاجئنا بكل شخصية عملتها على مدار مشوارها الفني، والاختلاف والتنوع ده ماكانش بس على مستوى شغلها، لأ دي قدرت من خلال اختيارها للحاجات اللي بتلبسها إنها تعبر عن شخصيتها وعرفت ازاي تختار لكل مناسبة بتحضرها اللبس اللي يليق عليها ويخليها مميزة ومحط أنظار كتير من الناس اللي بتشوفها.
فهتلاقي إنها بتظهر ساعات بإطلالات ناعمة وهادية بتبرز أنوثتها، وإطلالات تانية بتعبر عن شخصيتها القوية والطموحة، وإطلالات بتعبر عن عاداتها وتقاليدها وحبها لبلدها تونس، ومجموعة تانية من الإطلالات اللي بتظهر عفويتها وبساطتها وروحها الحلوة بعيدًا عن الأضواء والنجومية. ومجموعة تانية قالت في حوار صحفي قبل كده إنها بتستعين بيها من لبس جوزها وقت لما تحب تخرج عن اللبس التقليدي.
بتحب تظهر في الأعياد والمناسبات بإطلالات بتعبر عن الأجواء الاحتفالية اللي بنعيشها في أي مجتمع عربي، فهنلاقي مثلًا إنها بتبقى حريصة إنها تنزل صور لها على انستجرام بيبقى معظمها زيّ “القفطان” التونسي اللي بيعتبر من الأزياء الشعبية زيّ الجلاليب عند المصريين. ومن ضمن المجموعة دي كانت أبرز إطلالة منهم كانت في عيد الأضحى اللي فات، وقت لما نزلت صورة لقفطان من تصميم maisonatypik مكتوب عليه “إِذا الشَّعْبُ يوماً أرادَ الحياةَ، فلا بُدَّ أنْ يَسْتَجيبَ القدرْ” من أشهر الجمل اللي اتقالت في الشعر العربي، والجدير بالذكر إنها كانت للشاعر التونسي الشهير أبي القاسم الشابي. وفي الحقيقة إن لها أكتر من إطلالة مميزة للقفطان المغربي بتحرص دايمًا إنها تلبسهم في الأعياد أو وقت دخول شهر رمضان.
في اللقاءات الصحفية وأوقات على الريد كاربت، بتحب تظهر بالـOutFit اللي مش تقليدية بعيدة عن الفساتين، وكان أخرهم في واحد من المهرجانات اللي معروف عنها إن كل الفنانين والفنانات بيحبوا يظهروا فيها بمظهر كلاسيكي، بس كسرت هند صبري النمط ده وقت لما بعدت عن الأزياء المتعارف عليها في أي مهرجان وقررت إنها تلبس “بدلة رجالي” من الاستايلست ياسمين عيسى ومن تصميم orangesquarecairo ووقتها لفتت كل الأنظار لإنه كان ستايل مختلف وجديد ومش معتاد إن أي نجمة تظهر بيه على الريد كاربت وفي نفس الوقت كان حلو عليها!
وواحد من أبرز إطلالاتها في الفترة الأخيرة اللي كانت في حفل نقل المومياوات واللي وصفوفها بالـ”فخامة”، وكانت الستايليست وقتها مي جلال والمصممة مرمر حليم.
ومانقدرش ننسى طبعًا الـOutFits اللي بتبرز أنوثتها و في نفس الوقت ملامحها الهادية، لإنها بتتعمد إن مكياجها دايمًا يبقى هادي ومناسب لجو وستايل الفستان علشان يكملوا بعض. وكان من ضمنهم فستان من لابورجوازي اللي قدرت إنها تجمع فيه بين الأنوثة والجاذبية وكان مصنوع من التول ومطرز بالكريستال. والإطلالة دي اعتبروها مصممين وخبراء الموضة أفضل إطلالة لها في 2019.
وكان أخر فستان لفت الأنظار لبسته في مهرجان الجونة السنة دي وقت تكريم أحمد السقا وظهرت فيه باللون الأصفر وكان الستايلست سعيد رمزي والمصمم فؤاد سركيس.
أناقة وكاريزمة هند صبري كانت سبب في إنها تتصدر الصفحات الأولى لأهم المجلات العالمية وتبقى وجهة لأهم البراندات اللي موجودة على الساحة دلوقتي.