على مدار سنين، بنسمع أخبار عن ضبط بضائع وعملات متهربة أو ضبط أطنان من المخدرات، وبرغم إن المحاولات دي معظمها بيتم كشفها، بس بتفضل الطرق نفسها اللي بتتهرب بها البضايع تزيد غرابة كل مرة، وبيفتكسوا فيها بطرق ماتخطرش على البال، ويكاد يكون بيعملوا فيها مجهود ذهني وتفكير أكتر من تفكيرهم ازاي يجيبوا البضايع نفسها، والنهارده جمعنالكم أغرب حيل تهريب في المطارات في الوطن العربي.
في الفراخ المجمدة
الفراخ البيضاء أو المجمدة على طول عاملة مشاكل، وده اتأكدنا منه لما كشفت السلطات المصرية عن أغرب محاولة تهريب لعملات أجنبية داخل طيور مجمدة كانت مع واحد من المسافرين، ولقوا فيها حوالي 143 دولار أمريكي وأكتر من 91 ألف يورو، وده لإن القيمة المسموح إنك تسافر بها من مصر أو لـمصر لازم ماتعديش مبالغ معينة.
شاي بنكهة المخدرات
الشاي معروف عنه إنه وسيلة مزاج وسلطنة للعرب، مايقدروش يستغنوا عنه، بس تخيل لو اتحط فيه مخدرات؟ السلطات اللبنانية وقتها أعلنت عن ضبط شحنة من المخدرات حوالي سبع أطنان في أكتر من 430 صندوق شاي، كانت في طريقها عبر البحر لواحدة من الدول الأفريقية ومنها للسعودية بعد ما يغيروا بياناتها.
في الفيتامين “سي”
وزارة الداخلية الكويتية أعلنت عن ضبط 9 ملايين حبة من مخدر الـ “كبتاجون” بالتعاون مع قوات الأمن اللبنانية، قبل تهريبها من بيروت للكويت، وده بعد ما وصل لهم معلومات سرية بتفيد بوجود شحنة برتقال مستخبي فيها بطريقة احترافية المخدر اللي بيأثر على العقل، ومعبأة في أقفاص بلاستيك.
في الكتاب؟
حيلة تهريب الأفيون أو أي مادة مخدرة في البطن بقت حيلة قديمة ومكشوفة، والسعودية كشفت عن حيل كتيرة استخدمها المهربين في تهريب المخدرات، منها التهريب بين صفحات الكتب والمفكرات، علشان لما تحب تذاكر تعرف تعمل دماغ، والجديد بقى لما تم الإعلان في مطار الأمير محمد بن عبد العزيز الدولي في المدينة المنورة، إنه تم ضبط 6 جرامات من مادة الأفيون المخدرة، كانت محشية داخل طقم أسنان، الراكب حطه داخل فمه.
في الجزمة؟
بطريقة مموهة وذكية، ضبطت سلطات مطار القاهرة الجوي من سنتين راكب مسافر على طائرة مصر للطيران كانت رايحة للكويت، حاول تهريب (1650) قرص لعقار الترامادو، حوالي نص كيلو، مستخبية في نعل الأحذية، ودي مش المرة الأولى اللي يتم تهريب فيها عن طريق نعل الأحذية، حصلت قبل كده برضه في لبنان وبنفس الطريقة.