مسلسل الكبير بدأ، ومع أول حلقة النهارده 23 مارس، أول أيام شهر رمضان، بدأ الناس يتكلموا عنها، وأطلق مكي أغنية التتر الأيقونية (ولعانة) من كام أسبوع، بمشاركة الفنانة الشعبية هدى السنباطي، واللي نجحت بشكل كبير وسريع.
ومع ظهور الراقصة لورديانا في أول حلقات المسلسل، اختلفت آراء المشاهدين ما بين ناس عجبتها الحلقة وناس حست إن المسلسل مش بيقدم لهم أي كوميديا.
الناس اللي عجبتها الحلقة نصحت اللي ماتفرجش على الحلقة يشوفها، وناس اعتبرت إن أي حد يتكلم وحش عن المسلسل مش هيتقبلوا كلامه.
في آراء تانية أكدت إنها مش شايفة الكوميديا في المسلسل أو مش فاهماها، واعتبرت واحد من الجمهور في تويتة، إن حياته كانت هتكون أفضل لو كان بيضحك على الكبير ومسرح مصر زيّ باقي الناس.
في الوقت اللي عبر فيه بعض الجمهور إنهم بيتفرجوا على المسلسل بس لإنه جزء من التجمع العائلي، وإنهم طالما قاعدين مع أسرهم لازم يتفرجوا عليه معاهم.
الآراء عمومًا ناحية المسلسل مختلفة، ما بين حب كبير وعدم قبول، ويبدو إن عدم القبول ده أكتر في الأجيال الأصغر.
إيه رأيك في الحلقة الأولى من المسلسل؟ هل الكبير أوي بيقدم لك كوميديا لذيذة ولا مش بتضحك؟