في حفل بعنوان “ذكريات”، احتفاء بالموسيقار هاني شنودة وتاريخه ومسيرته الفنية، الرياض احتضنت حفلة ضمت عدد كبير من النجوم؛ زي عمرو دياب ومحمد منير وأنغام وأحمد عدوية ومصطفى حجاج وفرقة كايروكي ومنى عزيز عضو فرقة المصريين.
عمرو دياب طلع على مسرح الحفل برفقة الموسيقار هاني شنودة وقال: “أنا باجي المسرح ده وبغني عليه بقالي 3 سنين، بس المرة دي الموضوع مختلف جدًا، وشوفت نفسي وكأني لسه بغني لأول مرة.. مشواري كان بدايته معاك وعرفتني على فطاحل في مصر وأنا من هنا بشكرك على تاريخي اللي أنا عملته وكنت جزء منه ولولاك ماكنتش جيت من بورسعيد”.
وبعدها غنى الهضبة أول أغنيتين لحنهم له هاني شنودة وهما “يا طريق” و”الزمن” من ألبوم الهضبة الأول اللي صدر في 1983، وانضم له الموسيقار هاني شنودة لعزف أغنية “الزمن” على البيانو.
والكينج محمد منير غنى اتنين من أشهر الأغنيات اللي وزعها ولحنها له هاني شنودة وهما “بعشق البحر” و”علموني عينيكي”، اللي كانت أول تعاون بينهم، والأغاني كانت بتوزيعات جديدة من تنفيذ محمد العشري.
وشوفنا الهضبة والكينج بيغنوا مع بعض على المسرح، في أغنية “أمي الحبيبة” بقيادة هاني شنودة.
ورجعوا ذكريات زمن جميل من خلال وصلة قدمتها الفنانة منى عزيز من أعمال هاني شنودة وهي “ماشية السنيورة”، “الجواز راحة”، وبعدها طلعت على المسرح الفنانة مي فاروق وغنت أغنيتين، للفنانة فايزة أحمد “هدى الليل”، وللفنانة نجاة الصغيرة أغنية “بحلم معاك”، اللي عزف ألحانها هاني شنودة.
ده غير تقديم أشهر مقطوعات الموسيقى التصويرية اللي قدمها الموسيقار هاني شنودة خلال رحلته الطويلة مع الموسيقى التصويرية، مع أوركسترا بتضم 120 عازف مصري بقيادة هاني فرحات.