مجلة الكواكب مش بس واحدة من أهم وأقدم المجلات الفنية في الشرق الأوسط، وده شيء مفروغ منه، لكن اللي أخدنا بالنا منه إن الصور اللي في المجلة، وخصوصًا على الغلاف، متصورة بأسلوب تحس إنها الأيام دي مش صور عدى عليها عشرات السنين، يعني لو شيلت تفاصيل الصورة من عليها، اللي يشوفها لأول مرة هيحس إنها صورة اتلقطت من كام يوم.
حبينا نسلط الضوء على شوية من الصور اللي عجبتنا، لإن المجلة كانت بتهتم بالصور بشكل كبير ومعظم الأعداد كان فيها ملحق مصور، بنشارككم بعض الصور دي في رثاء المجلة اللي قدمت لنا 90 سنة من الفن، وقدمته بشكل مختلف ومميز بإمكانيات على قد عصرها، لكن الإبداع فيها عدى الزمن.
الجانب الآخر من الفنانين
ممكن دي تكون أول مرة تشوف فيها الفنانة أمينة رزق بشكل مختلف عن النمط اللي متعود تشوفها به وانطبع في خيالك عنها، صورة أمينة رزق في شبابها بتكنيك مميز في التصوير، ناس كتير أول ما شافت الصورة ماصدقتش إنها أمينة رزق.
ده غير المواضيع الصحفية اللي كانت بتنشرها المجلة عن كل فنان، بتخلي الجمهور يعرف عنه جانب تاني غير اللي بيشوفوه على الشاشة.
والصورة دي للفنانة سامية جمال، بوضعية التصوير والألوان والإضاءة، اللي تحس إنك شوفتها قريب في جلسة تصوير لأشهر المصورين في 2023، مش صورة عدى عليها يمكن 50 سنة، الصورة دي اتنشرت في عدد للمجلة مع قصة حياة سامية جمال بقلمها.
والصورة دي، اللي كانت سبب رئيسي في فكرة كتابة المقال ده، وخلتنا نقف قدامها كتير.
صورة الفنانة فاطمة رشدي الممثلة المصرية، لكن صورة مختلفة عن أي صورة هتشوفها لها على مدار حياتها. والتصوير ده اللي خلّانا فعلًا مندهشين، ازاي المصور ده التقط صورة زي دي بتفاصيلها وطريقتها من سنين كتير؟
المجلة الفنية الرائدة
الكواكب تعتبر واحدة من أكبر المجلات الفنية اللي اتعملت في الشرق الأوسط وأهمها، كانت بتصدر بشكل أسبوعي لمدة 90 سنة، صدر العدد الأول منها في 28 مارس 1932 وكانت وقت صدورها بتنشر ملخصات لأفلام الأسبوع، ولقاءات مع النجوم، ومقالات لرجال السينما، ده غير أخبار الأفلام اللي بتتصور ومتابعة كواليسها والانفراد بلقاءات مع نجوم العمل الفني والمشاركين فيه، وكمان كانت بتنفرد بلقاءات مع نجوم عالميين مش بس عرب.
المجلة أصدرها الصحفي اللبناني جورج زيدان، مؤسس دار الهلال وكان إميل وشكري أولاده بيقوموا بالإشراف على إصدارات الدار، وعدى عليها رؤساء تحرير مشاهير الصحفيين؛ زي فهيم نجيب ومجدي فهمي ورجاء النقاش وراجي عنايت وحسن إمام عمر وكمال النجمي وحسن شاه ومحمود سعد.
الكواكب -حتى بعد توقف إصدارها- هتفضل إرث كبير للفن المصري والعربي، وعاشت رحلة مع العصر الذهبي للفن والسينما في مصر، وعرفنا منها تفاصيل وكواليس عن نجومنا اللي بنحبهم وفي أعمال فنية لسه عايشة معانا.