تويت أثارت موجة من التعليقات وردود الأفعال، كتبها رجل الأعمال الأمريكي من أصل جنوب إفريقي “إيلون ماسك”، ردًا على فيديو نشرته صفحة (Weird and Terrifying)، من داخل معبد دندرة في جنوب مصر، في محافظة قنا، وبيظهر الفيديو سلسلة من السلالم المنحوتة في الصخر، داخل المعبد.
كتب ماسك، ردًا على الفيديو: “مصدر القديمة كانت..” مع إيموجي النار، في إشارة منه إن مصر القديمة كانت متميزة ورائعة.
جت ردود فعل مختلفة كتير على تويت ماسك، من فنانين وإعلاميين ورجال سياسة مصريين، بيدعوا فيها رجل الأعمال الأمريكي لزيارة مصر، والمشاركة في افتتاح المتحف المصري الكبير، اللي هيبقى أكبر متحف في العالم مُخصص لآثار حضارة واحدة.
وقال المذيع المصري شريف عامر، في رد على تويت ماسك: “كل حاجة لسه في مكانها، تقدر تيجي تشوف بنفسك، وعندنا عربيات تسلا تقدر تستخدمها”.
عرض الفنان المصري محمد هنيدي يكون المرشد السياحي الخاص لإيلون ماسك، أما رجل الأعمال نجيب ساويرس فرد بصور إيموجي قلوب، وكتب نائب مجلس الشعب السابق محمد أبو حامد: “مرحبًا بك في أم الدنيا.. مصر”.
وقالت وزيرة التعاون الدولي المصرية رانيا المشاط : “تعالى معانا واكتشف قصص أكتر عن مصر القديمة في المتحف المصري الكبير مع المجموعة الكاملة.. للملك توت عنخ أمون.. تجربة ملهاش مثيل، مصر بترحب بك”.
قال عمرو القاضي الرئيس التنفيذي لهيئة تنشيط السياحة، خلال مكالمة تليفونية مع برنامج (من مصر) مع الإعلامي عمرو خليل على قناة سي بي سي: “شيء طبيعي ومتكرر إن كل اللي يشوف لحضارة المصرية من العالم يحصل له انبهار بالفن والجمال والعظمة وبقاء التحف دي لآلاف السنين”.
وكشف إنهم بيحاولوا يتواصلوا معاه علشان يدعوه لزيارة مصر: “بنحاول نتواصل مع إيلون ماسك وندعوه لزيارة مصر، لكن هو عنده جدول أعمال وزيارات ومستنين لما ييجي الرد”.
وأضاف: “لو زار إيلون ماسك مصر بالتأكيد زيارته هتزود ثقافته وعلمه بحضارة عظيمة زي الحضارة المصرية القديمة، واحنا نستفيد بالترويج المجاني للآثار والسياحة المصرية”.
من الجدير بالذكر، إن إيلون ماسك واحد من المؤمنين إن الحضارة المصرية القديمة من صناعة مخلوقات فضائية، وكتب تويت في سنة 2020، وضح فيها إيمانه بده: “من الواضح إن المخلوقات الفضائية قامت ببناء الأهرامات”، واستتبع التويت دي بمجموعة من التويتات عن طبيعة الملك رمسيس الثاني الفضائية، من وجهة نظره، واستحالة إن يكون المصريين القدماء هما اللي بنوا الأهرامات.