محافظ البحر الأحمر أعلن يوم الاتنين عن تفعيل قرار منع استخدام “جيت سكي” في كل مدن المحافظة، حفاظًا على أرواح المواطنين والسياح، وقال إن القرار ده موجود وسبق صدوره في 2010 بس ماتمش تفعيله، بس هيتم تفعليه والتشديد دلوقتي والعقوبات ممكن توصل لمصادرة المركبة.
والسبب الأساسي إن حوادث المركبة دي كارثية وخطيرة، خصوصًا مع الرواج السياحي اللي بتشهده مدن المحافظة بالذات مدينة الغردقة. وبمناسبة المنع اللي صدر ده، هنفكرك بحاجات وسلوكيات لازم نكون مابنعملهاش أو نبطل نعملها لإنها في الأساس بتضر الحياة البحرية وبتهدد أرواح الناس.
نبطل نرمي زبالة
من الحلول اللي ممكن تبقى عملية وتخلينا نقلل من موضوع رمي الزبالة ده شوية إننا واحنا على البحر نستخدم حاجات قابلة للتدوير؛ يعني نقدر نروح بيها البيت ونستخدمها تاني. ممكن مثلًا حاول على قد ما نقدر نقلل من استخدام الأكياس والأزايز والكوبايات البلاستيك، خصوصًا إن الأكياس مثلًا بتاخد وقت لما تتحلل، والسلحفاة البحرية مثلًا، اللي بتتغذى على القناديل، بتتخيل إن الكيس ده هو القنديل، فلما بتقرب له بيلف حواليها وبتتخنق؛ فاحنا كده بنفقد واحدة من أهم الكائنات البحرية النادرة اللي بتعمر فوق الـ100 سنة. ومخلفات السجاير برضه بتُعتبر واحدة من السلوكيات اللي ممكن تأذي الكائنات البحرية والزواحف اللي على الشط، وممكن أعواد السيجارة دي تسبب حرائق في الحر، ده غير إن وجودها بيبوظ شكل الشاطيء العام.
وحسب تصريحات لروان عبد الوكيل، خبيرة بالبيئة البحرية لجريدة البوابة نيوز، واحدة من الدراسات بتقول إن رمي المخلفات بيأثر على أكتر من 700 نوع من الكائنات البحرية، و 60% من الطيور البحرية معدتها فيها بلاستيك، و 100% من السلاحف البرية معدتها برضه فيها بلاستيك.
المخالفات اللي بنعملها ضد الشعب المرجانية
الشعاب المرجانية مصدر رزق وسياحة وثروة طبيعية مش المفروض نضيعها، واحد من أهم الأسباب اللي بتخلي الناس والسياح تقرر تجرب الغوص هي الشعاب المرجانية بمختلف أشكالها، فتخيل لو احنا فقدنا المصدر ده هنعمل إيه؟ زيّ الصيادين اللي بيعملوا عمليات تفجير للشعاب المرجانية في وقت صيد سمك الزينة، فبيكسروها علشان تتباع بالقطعة الواحدة في شكل هدايا تذكارية. والمفروض كمان ما نوقفش على الشعاب وده بيكسرها، وكل ده واحنا عارفين دور الشعاب في إنها تحافظ على الحياة البحرية لإن زيّ ما النباتات بتدي لنا الأكسجين الشعاب المرجانية بتعمل نفس الحاجة ومهمة في المحيطات علشان نحافظ على أنواع كتيرة من الأحياء ا اللي بتعيش فيها.
نبطل نأكل السمك
حوادث هجوم أسماك القرش على البشر ليها أسباب كتير، ومن ضمنها السلوكيات الغلط اللي بنعملها، زيّ إننا نأكل السمك أو نرمي لها أي حاجة علشان نجذبه علشان يطلع على سطح المياه، أو نرمي لها فضلات واحنا راكبين لانش، كل ده بيوصّل السمك إنه يبقى مستعد في أي لحظة مافيهاش أكل إنه يروح على الأماكن اللي مارحهاش قبل كده. وغير إن ده بيمثل خطر على البشر، بس كمان بيغير سلوك الأسماك وبيعمل خلل في النظام البيئي لإن السمك في الأساس بيتغذى على السمك الميت.
ومن ضمن السوكيات برضه إننا نطلع السمك الكبير والنادر علشان نتصور معاه أو إننا نطارده؛ وده بيسبب خوف وذعر للسمك، وممكن يبوظ الشعاب اللي موجودة حواليه.
نقلل من استخدام البيتش باجي
وأخر حاجة لازم نختم بيها هي البيتش باجي، هو مالوش علاقة بالحياة البحرية بس من ضمن السلوكيات اللي محتاجينها تتغير واحنا موجودين على الشط، وبمناسبة كمان الخبر اللي بنتكلم عنه النهارده.
في حملات بتتعمل كل صيف لتقنين الموضوع ده، ولازم نسمع على الأقل حادثة أو اتنين من منطقة واحدة. البيتش باجي على الشواطيء مشكلته إن في ناس بتزوّد في سرعته بشكل مبالغ فيه، ومش بيبقوا مراعيين إن الشط ده في ناس وزحمة، وممكن تحصل أي حاجة مايقدرش يفرمل، خصوصًا لو على الشط بليل الرؤية بتبقى أضعف، ده غير إن ساعات في أطفال بيركبوه مش بيقى عندهم القدرة إنهم يتحكموا في نفسهم مع السرعة وبتحصل الحوادث. وبسبب ده، في مخالفات كتير الشرطة بترصدها وبتعمل حملات لضبط المخالفين.